އީރާނާއި އެމެރިކާ އާ ދެޤައުމުން ސުލްހައިގެ ވާހަކަތަކަށް ދާން ނިންމުމުން އެކަމަށް ދިވެހި ހާރިޖިއްޔާއިން މަރުހަބާ ކިޔައިފިއެވެ.

ސްވިޒަރލެންޑްގައި ބޭއްވި ވާހަކަތަކަށްފަހު އީރާނުން ވަނީ އެމެރިކާ އާއެކު ސުލްހައިގެ އިތުރު ވާހަކަތައް ފެށުމަށް ތައްޔާރަށް އޮތްކަން ހާމަކޮށްފައެވެ.

މިކަމާ ގުޅޭގޮތުން ދިވެހި ހާރިޖިއްޔާގެ އޮފީހުން ނެރުނު ބަޔާނުގައި މިރޭ ބުނެފައިވަނީ، އީރާނާއި އެމެރިކާ އާ ދެޤައުމުގެ ހުރި ދެބަސްވުންތައް ނައްތާލުމަށް ވާހަކަތައް ފެށުމަށް އެއްބަސްވުމަކީ އެކަމަށް ދިވެހިރާއްޖެއިން މަރުހަބާކިޔާ ކަމަށެވެ. ހާރިޖިއްޔާގެ ބަޔާނުގައި ވަނީ، ދެ ޤައުމުން ޑިޕްލޮމަސީގެ މަގު ހިޔާރުކޮށް މިހާރު ހުރި ކަންބޮޑުވުންތަކަށް ހައްލެއް ގެނައުމަށް ނިންމައި، މަޝްވަރާގެ މަގުން ކުރިއަށްދިއުމަށް ދެ ފަރާތުން ދެއްކި ސާބިތުކަމަށްޓަކައި ދިވެހިރާއްޖެއިން އެކަން ބަލައިގަނެ އެކަމަށް ތައުރީފްކުރާކަމަށެވެ.

ދިވެހި ހާރިޖިއްޔާއިން ވަނީ އީރާނާއި އެމެރިކާ އާ ދެޤައުމު މަޝްވަރާތަކަށް މަގުފަހިކޮށްދިނުމަށް ޕާކިސްތާނާއި، ގަތަރާއި، ގަލްފުގެ އެހެނިހެން ގައުމުތަކަށް ޝުކުރު އަދާކޮށްފައެވެ.

" މި ހެޔޮ ބަދަލުގެ ސަބަބުން ސަރަހައްދީ އެއްބާރުލުން އިތުރުވެ، ދެމެހެއްޓެނިވި އިގްތިސާދީ ކުރިއެރުމަކާއި ދާއިމީ ސުލްހައާއި ހަމަޖެހުމަށް މަގުފަހިވެގެންދާނެ ކަމަށް އުއްމީދުކުރަން" ދިވެހި ހާރިޖިއްޔާގެ ބަޔާނުގައި ބުންޏެވެ.

ސްވިޒަރލެންޑްގައި ބޭއްވި ވާހަކަތަކަށްފަހު އީރާނުގެ  މަޖިލީހުގެ އިގްތިސާދީ ކޮމިޝަންގެ މެމްބަރުންނާ ވާހަކަދައްކަވަމުން ޚާރިޖީ ވަޒީރު އައްބާސް އަރަގްޗީ ވިދާޅުވެފައިވަނީ، އީރާނާ އެމެރިކާ އާ ދެމެދު މަޝްވަރާތައް ކުރިއަށްދަނީ ދެފަރާތުގެ ދެމެދުގައި އޮތް އިތުބާރު ނެތުމުގެ މާހައުލެއްގެ ތެރެއިންކަމަށެވެ. އަގާޗީ މިމޭރުމުން ވިދާޅުވެފައިވަނީ އީރާނާއި އެމެރިކާ އާ ދެމެދު މީގެކުރިން ކުރިއަށްގެންދިޔަ ވާހަކަތަކަށް ރިޔާއަތްކޮށެވެ. މީގެ ކުރިން ދެ ފަރާތުގެ ދެމެދުގައި ކުރިއަށްގެންދިޔަ ވާހަކަތަކުން ރަނގަޅު ނަތީޖާތަކެއް ނެރެވިފައި ނުވާކަމަށް އީރާނުން ވަނީ ބުނެފައެވެ.