ވަރލްޑްކަޕް ގްރޫޕް ޖީގައި ރޭ ބެލްޖިއަމް ކައިރިން މޮޅުވާން ލިބުނު ފުރުސަތު މިސްރުން ނަގާލައިފިއެވެ.

މިސްރާއި ބެލްޖިއަމް ބައްދަލުކުރިމެޗް 1-1 ގެ ނަތީޖާއަކުން އެއްވަރުވެގެން ނިމުނުއިރު، މިމެޗްގައި އެންމެފުރަތަމަ ލަނޑެއްޖަހައި ކުރި ހޯދީ މިސްރުންނެވެ. އެއީ 17 ވަނަ މިނެޓް ތެރޭގައި އިމާމް އަޝޫރު އެވެ. މެޗްގެ ފުރަތަމަ ހާފް ނިމުނީ މިސްރު ކުރީގައި އޮވެގެންނެވެ. އަދި މިއީ ވަރލްޑްކަޕް ތާރީހުގައިވެސް ފުރަތަމަ ފަހަރަށް މޮޅަކާއެކު މިސްރުން ހާފް ނިންމާލި ފުރަތަމަ މެޗެވެ. 

މެޗުން މޮޅުވުމަށް މިސްރު ކުރަމުން އައި އުއްމީދުތައް ގެއްލިގެންދިޔައީ، ޑިފެންދަރު މުހައްމަދު ހާނީ އަތުން 66 ވަނަ މިނެޓް ތެރޭގައި ބައިކޮޅަށްވަތް ލަނޑުންނެވެ. ސީޓްލްގެ ގަދަ ހޫނުގައި ކުޅުނު މިމެޗްގައި ބެލްޖިއަމުން ވަނީ ލަނޑު ޖަހާނެ ރަނގަޅު ފުރުސަތުތައް ހޯދާފައެވެ. އެގޮތުން މެޗުގެ ފަހުކޮޅު ލުކާކޫއަށް ލިބުނު ފުރުސަތެއްގައި އޭނާ ބޮލުން ފޮނުވާލި ބޯޅަ ދިޔައީ ގޯލުގެ މަތިން ބޭރަށެވެ.

މިމެޗުން މިސްރު މޮޅުވިނަމަ، އެޓީމަށް ވޯލްޑް ކަޕްގައި މޮޅެއް ނުލިބި ހޭދަވި 92 އަހަރުގެ އިންތިޒާރަށް ނިމުމެއް ގެނެވުނީހެވެ. މިމެޗްގައި ދެ ތަރިންކަމަށްވާ ކެވިން ޑި ބްރޭނާ އާއި މުޙައްމަދު ސަލާޙްގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ.