ވަރލްޑްކަޕް ފުޓްބޯޅަ މުބާރާތުގެ ގްރޫޕް އެޗްގައި ދެކުނު އެމެރިކާގެ ގަދަ ބާރެއްކަމަށްވާ އުރުގުއޭ އާއި ސައުދީ އަރަބިއާ ބައްދަލު ކުރިމެޗް އެއްވަރުވެއްޖެއެވެ.
މެޗްގައި ތަރިއަކަށް ވެގެންދިޔައީ ސައުދީގެ ގޯލް ކީޕަރު މުހައްމަދު އަލް-އުވައިސް އެވެ. މިމެޗްގައި އޭނާ ވަނީ އާދަޔާ ހިލާފު މޮޅު ކުޅުމެއް ދައްކާފައެވެ.
މެޗުގެ ފުރަތަމަ ހާފުގެ ފަހުކޮޅު ސައުދީގެ މުހައްމަދު ކަންނޯ ބޮލުން ފޮނުވާލި ބޯޅައެއް، އުރުގުއޭގެ ތަޖުރިބާކާރު ކީޕަރު ފެނާންޑޯ މުސްލޭރާ ދިފާއުކުރި ނަމަވެސް، ރީބައުންސްވި އެ ބޯޅަ އަބްދުލްއިލާހް އަލް-އަމްރީ ވަނީ ގޯލުގެ ތެރެއަށް ފޮނުވާލައި ސައުދީއަށް ލިޑް ނަގައިދީފައެވެ. މެޗްގެ ފުރަތަމަ ހާފް ނިމުނީ މި ނަތީޖާގައި އޮވެގެންނެވެ.
ފުރަތަމަ ހާފްގައި އުރުގުއޭއިން ނުރައްކާތެރި ހަމަލާތަކެއް ފޮނުވާލިނަމަވެސް ސައުދީގެ ކީޕަރު ވަނީ އެ ހުރިހާ ހަމަލާއެއްވެސް ދިފާއުކޮށްފައެވެ.
ސައުދީން ހިފަހައްޓަމުން އައި ލިޑް ގެއްލުނީ 80 ވަނަ މިނެޓް ތެރޭގައި އުރުގުއޭގެ ފޯވަޑް އަރައުޖޯ ކާމިޔާބުކޮށްދިން ލަނޑުންނެވެ. މި މެޗުން ސައުދީއަށް މޮޅު ނުވެވުނު ނަމަވެސް މެޗްގެ މޮޅުކުޅުންތެރިޔާގެ މަގާމް ހޯދީ ގޯލްކީޕަރު މުހައްމަދު އަލް-އުވައިސް އެވެ.
Advertisement
This content is created and paid for by advertisers and does not involve Voice Journalists
