ގޮންޖެހުންތައް ހުރިނަމަވެސް އީރާނުން ނިއުޒިލެންޑް ހިފަހައްޓައި އެޓީމްގައި އޮތް ރޫހު ދައްކާލައިފިއެވެ.

އެމެރިކާގައި ކުޅުނު މިމެޗަށް އީރާން ޓީމް ނިކުތްއިރު އެޓީމް މުބާރާތަށް ނިކުތީ އެތަކެއް ހުަރސްތަކާއި ބޮޑެތި ގޮންޖެހުންތަކާއެކުގައެވެ. އެގޮތުން އެންމެބޮޑު ގޮންޖެހުމެއް ކުރިމަތިލާން ޖެހުނީ މުބާރާތް ބައްވާ އެމެރިކާގެ ފަރާތުންނެވެ. އީރާނާއި އެމެރިކާ އާއި ދެމެދު ކުރިއަށްދާ ހަނގުރާމައިގެ ސަބަބުން އީރާން ޓީމަށް މިފަހަރު ވަރލްޑްކަޕަށް ތައްޔާރުވެ މުބާރާތައް އާދެވުނީ ވަރަށްބޮޑެތި ގޮންޖެހުންތަކާއެކުގައެވެ.

ދެ ޓީމްގެ ފަރާތުންވެސް ފޯރިގަދަ ކުޅުމެއް ފެނިގެންދިޔަ މިމެޗްގައި ނިއުޒިލެންޑުން ވަނީ ހަތްވަނަ މިނެޓް ގައި ލީޑް ނަގާފައެވެ. މިލަނޑު ކާމިޔާބުކޮށްދިނީ، ނޮޓިންގހަމް ފޮރެސްޓުގެ ފޯވާޑް ކްރިސް ވުޑް ދިން ބޯޅައަކުން، މަދަވެލްގެ ފޯވާޑް އެލައިޖާ ޖަސްޓެވެ.

ނިއުޒިލެންޑުން ލީޑް ނަގާފައިވަނިކޮށް ފުރަތަމަ ހާފް ނިމުމުގެ ކުރިން އީރާނުން ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކޮށްދިނީ، 32 ވަނަ މިނެޓް ތެރޭގައި ރާމިން ރެޒާ އިއާން އެވެ.

މެޗްގައި ދެވަނަ ފަހަރަށް ނިއުޒިލެންޑުން ލީޑް ނަގައިދިނީވެސް ޖަސްޓެވެ. ނިއުޒިލެންޑުން ލީޑް ނެގިތާ 10 މިނެޓް ތެރޭގައި އީރާނުގެ މުޙައްމަދު މުހިއްބީ ބޮލުން ފޮނުވާލި ބޯޅަ ގޯލުގެ ތެރެއަށް ވައްދާލައި މެޗްގެ ނަތީޖާ ވަނީ ހަމަހަމަކޮށްފައެވެ. މި މެޗަކީ މި މުބާރާތުގައި މިހާތަނަށް ފެނިގެންދިޔަ އެންމެ ފޯރިގަދަ މެޗްކަން ފާހަގަކޮށްލެވެއެވެ. މެޗްގައި އީރާން ޓީމްގެ ފަރާތުން ވަނީ މޮޅު ކުޅުމެއް ފެނިގެންގޮސްފައެވެ.

އީރާން ހިމެނޭ ގްރޫޕަށް ބަލާއިރު، މިހާތަނަށް ކޮންމެ ޓީމަކުންވެސް އެއްމެޗް ކުޅެ ނިންމާލިއިރު ކޮންމެ ޓީމަކަށްވެސް ވަނީ އެއް ޕޮއިންޓް ލިބިފައެވެ.