ދައުލަތަށް އާމްދަނީ އާއި ހިލޭ އެހީގެ ގޮތުގައި މި އަހަރުގެ މިހާތަނަށް 19.1 ބިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީން ބުނެފިއެވެ.

މާލީ ވުޒާރާއިން ނެރުނު އެންމެފަހުގެ ވީކްލީ ފިސްކަލް ޑިވެލޮޕްމަންޓް ރިޕޯޓްގައި ބުނެފައިވަނީ، މިހިނގާ ޖޫންމަހުގެ ހަތަރުވަނަ ދުވަހުގެ ނިޔަލަށް ދައުލަތަށް ލިބުނު ޖުމްލަ އާމްދަނީއާއި ހިލޭ އެހީގެ މިންވަރު 19.1 ބިލިއަން ރުފިޔާއަށް އަރާފައިވާކަމަށެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު، 10.1 އިންސައްތަ ނުވަޔަ 1.8 ބިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި އާމްދަނީ އާއި ހިލޭ އެހީގެ ގޮތުގައި ލިބިފައިވަނީ، 17.3 ބިލިއަން ރުފިޔާއެވެ.

މިކަމާ ގުޅޭގޮތުން ފިނޭންސުން ބުނީ މިއީ ރާއްޖޭގެ މައިގަނޑު އިޤްތިޞާދީ ހަރަކާތްތަކުން ލިބޭ އާމްދަނީ މެދުނުކެނޑި ކުރިއަރަމުންދާކަން ހާމަކޮށްދޭ ހެތްކެއް ކަމަށެވެ. އަހަރުގެ މިހާތަނަށް ދައުލަތަށް އާމްދަނީގެ ގޮތުގައި ބޮޑު އަދަދެއް ލިބުނީ ޓެކުހުންނެވެ. ދައުލަތަށް ލިބުނު ޖުމްލަ އާމްދަނީގެ 78 އިންސައްތައަކީ ޓެކްސްގެ ގޮތުގައި ލިބުނު ފައިސާއެވެ. މިއަހަރުގެ މިހާތަނަށް ޓެކުހުގެ ގޮތުގައި 14.8 ބިލިއަން ރުފިޔާ ލިބިފައިވާއިރު، މިދިޔަ އަހަރުގެ މި މުއްދަތުގައި އެ އަދަދު އުޅެނީ 13.2 ބިލިއަން ރުފިޔާގައެވެ.

ޓެކުހުގެ ގޮތުގައި އެންމެބޮޑު އާމްދަނީއެއް ލިބުނީ ޓީޖީއެސްޓީންނެވެ. ޓީ.ޖީ.އެސް.ޓީގެ ގޮތުގައި 5.6 ބިލިއަން ރުފިޔާ ލިބިފައިވާއިރު، މިއަހަރު އެ އަދަދު ވަނީ 6.0 ބިލިއަން ރުފިޔާއަށް އަރާފައެވެ. މިއީ 7.6 އިންސައްތައިގެ ކުރިއެރުމެކެވެ. މީގެއިތުރުން، އާންމު މުދަލާއި ޚިދުމަތުގެ ޓެކްސް (ޖީ.އެސް.ޓީ) ގެ ގޮތުގައި ލިބުނު އާމްދަނީ ވެސް ވަނީ 2.2 ބިލިއަން ރުފިޔާއިން 2.5 ބިލިއަން ރުފިޔާއަށް އިތުރުވެފައެވެ.

ހަރަދުތަކާ ގުޅޭގޮތުން ފިނޭންސްގެ ރިޕޯޓްގައި ބުނެފައިވަނީ، ޖޫންމަހުގެ 4 ވަނަ ދުވަހުގެ ނިޔަލަށް ދައުލަތުގެ ރިކަރަންޓް އަދި ކެޕިޓަލް ޚަރަދުގެ ޖުމްލަ އަކީ 19.2 ބިލިއަން ރުފިޔާ ކަމަށެވެ. މިއީ މިދިޔަ އަހަރާ އަޅާބަލާއިރު 17.6 އިންސައްތަ އިތުރު އަދަދެކެވެ. ހަރަދުތައް އިތުރުވުމުގެ މައިގަނޑު ސަބަބެއްގޮތުގައި ފާހަގަކޮށްފައިވަނީ، މަގުތަކާއި ފާލަން އަދި އެއާޕޯޓް ފަދަ އުމްރާނީ މަޝްރޫޢުތަކަށް ކުރާ ހޭދަ އިތުރުވުމެވެ. އެގޮތުން މިއަހަރުގެ މިހާތަނަށް މިފަދަ މަޝްރޫޢުތަކަށް 818.6 މިލިއަން ރުފިޔާ ހޭދަކޮށްފައިވާކަމަށް ރިޕޯޓުން ދައްކައެވެ.

ފިނޭންސްގެ ރިޕޯޓްގައި އިތުރަށް ފާހަގަ ކޮށްފައިވާގޮތުން ޕީއެސްއައިޕީގެ ޚަރަދުތަކުގެ އިތުރުން، މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލިފައިވާތީ ސަބްސިޑީތަކަށް ކުރާ ޚަރަދު، 2025 ވަނަ އަހަރުގެ މި މުއްދަތާ އަޅައިބަލާއިރު މިއަހަރު ވަނީ ބޮޑުވެފައެވެ. އެގޮތުން ޖޫން ހަތަރެއްގެ ނިޔަލަށް ސަބްސިޑީއަށް 1.3 ބިލިއަން ރުފިޔާ ޚަރަދުކޮށްފައިވާއިރު، މިއަހަރު މި މުއްދަތުގައި 2.3 ބިލިއަން ރުފިޔާ ހިނގައި ގާތްގަނޑަކަށް ހަރަދުތައް ވަނީ ދެގުނަ މައްޗަށް ގޮސްފައެވެ.

ފިނޭންސުން ބުނީ ތަފާސްހިސާބުތަކުން ދައްކާގޮތުން ފަތުރުވެރިކަމުގެ ސިނާއަތުން ލިބޭ އާމްދަނީއާއެކު ދައުލަތުގެ މާލީ ދުޅަހެޔޮކަން އިތުރުވަމުންދާ ކަމެވެ. އަދި މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރައްޔިތުންނަށް ފޯރުކޮށްދޭ އަސާސީ ޚިދުމަތްތަކުގެ އަގު އުފުލުނަ ނުދީ ހިފަހައްޓާފައިވުމުގެ ސަބަބުން ސަބްސިޑީތަކަށް ދައުލަތުން ކުރާ ޚަރަދު ބޮޑުވެފައިވާކަމެވެ. އެހެން ނަމަވެސް، އުމްރާނީ ތަރައްޤީއާއި ރައްޔިތުންނަށް ބޭނުންވާ މުހިންމު ޚިދުމަތްތައް ފޯރުކޮށްދިނުމަށް ދައުލަތުން ކުރާ އިންވެސްޓްމަންޓްތައް މެދުނުކެނޑި ކުރިއަށްދާކަންވެސް ވަނީ ފާހަގަކޮށްފައެވެ.