ވަރލްޑްކަޕް ފުޓްބޯޅަ މުބާރާތުގައި ނޯވޭ އާއި އިރާގް ބައްދަލުކުރިމެޗް ފަސޭހަކަމާއެކު ނޯވޭއިން ކާމިޔާބުކޮށްފިއެވެ.

މިމެޗް އިރާގްގެ މައްޗަށް ނޯވޭ ކުރި ހޯދީ 4-1 ގެ ނަތީޖާއިންނެވެ. މެޗްގައި ތަރިއަކަށްވީ މެންޗެސްޓަރ ސިޓީގެ ފޯވަޑް ހާލަންޑެވެ. އޭނާ ވަނީ މިމެޗްގައި ދެ ލަނޑު ނޯވޭއަށް ކާމިޔާބުކޮށްދީފައެވެ.

އެމެރިކާގެ ބޮސްޓަންގައި ކުޅުނު މިމެޗްގައި ނޯވޭއިން ލީޑް ނަގާފައިވަނީ 29 ވަނަ މިނެޓް ތެރޭގައެވެ. ހާލަންޑްގެ މި ލަނޑާއެލު ނޯވޭއިން ލިޑް ނެގިނަމަވެސް އިރާގުން ވަނީ އޭގެ ނުވަ މިނެޓް ފަހުން ލަނޑެއް ޖަހައި މެޗްގެ ނަތީޖާ އެއްވަރުކޮށްފައެވެ. މި ލަނޑު ކާމިޔާބުކޮށްދިނީ އެމެރިކާއަށް އެތެރެވިއިރު އެ ގައުމުގެ ކަމާބެހޭ ފަރާތްތަކުން ހަތް ގަޑިއިރެއްހާއިރު ހިފަހައްޓައި ސުވާލުކުރި އިރާގުގެ އައިމަން ހުސައިން އެވެ. މިއީ ވޯލްޑް ކަޕް ތާރީޚުގައި އިރާގުން ޖެހި ދެވަނަ ލަނޑެވެ. އަދި މިއީ ވޭތުވެދިޔަ 40 އަހަރު ތެރޭގައި އެ ގައުމުން ވޯލްޑް ކަޕްގައި ކާމިޔާބުކުރި ފުރަތަމަ ލަނޑުވެސް މެއެވެ. މެޗުގެ ފުރަތަމަ ހާފް ނިމުމުގެ ކުރިން ހާލަންޑް ވަނީ  ދެވަނަ ފަހަރަށް ނޯވޭއަށް ލީޑް ނަގައިދީފައެވެ.

މެޗްގައި ފެނިގެންދިޔަ ނޯވޭގެ ތިންވަނަ ލަނޑު ކާމިޔާބުކޮށްދިނީ، މެޗު ނިމެން 14 މިނެޓަށް ވެފައި ވަނިކޮށް މާޓިން އޮޑެގާޑް ނަގައިދިން ކޯނަރަކުން ލިއޯ އޮސްޓިގާޑެވެ. ވަނީ ބޮލުން ޖަހައި ނޯވޭގެ ތިންވަނަ ލަނޑު ކާމިޔާބުކޮށްފައެވެ. 

މެޗްގައި ފެނިގެންދިޔަ ނޯވޭގެ ހަތަރުވަނަ ލަނޑަކީ، މެޗުގެ އިތުރު ވަގުތުގެ ތެރޭގައި ހާލަންޑް ފޮނުވާލި ބޯޅައެއް އިރާގުގެ ހުސައިންގެ ގައިގައި ޖެހިފައި ބައިކޮޅަށް ވަތް ލަނޑެކެވެ.