ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަރަށްބޮޑަށް ދަށަށް ގޮސްފައިވާއިރު، އަވައްޓެރި ސްރީލަންކާއަށް ޒިޔާރަތްކުރާ ފަތުރުވެރިންގެ އަދަދުވެސް ވަރަށްބޮޑުތަން ދަށަށް ހިނގައްޖެއެވެ.

ސްރީލަންކާގެ ޓޫރިޒަމް ޑިވެލޮޕްމަންޓް އޮތޯރިޓީގެ ތަފާސްހިސާބުތަކަށް ބަލާއިރު، މިހިނގާ ޖޫންމަސް ފެށުނުފަހުން ދުވާލެއްގެ މައްޗަށް ޖުމްލަގޮތެއްގައި ޒިޔާރަތްކުރާ ފަތުރުވެރިންގެ މިންވަރު އުޅެނީ، ތިންހާހާއި ހަތަރު ހާހާ ދެމެދުގެ އަދަދެއްގައެވެ. މިމަހުގެ ފުރަތަމަ ހަފްތާގެ ތެރޭގައި ލަންކާއަށް 27،043 ފަތުރުވެރިން ޒިޔާރަތްކުރިއިރު، ދެވަނަ ހަފްތާގައި 27،422 ފަތުރުވެރިން ޒިޔާރަތްކުރިއެވެ. އެހެންކަމުން މިހިނގާ 14 ވަނަ ދުވަހުގެ ނިޔަލަށް ލަންކާއަށް ވަނީ 54،465 ފަތުރުވެރިން ޒިޔާރަތްކޮށްފައެވެ. 

ލަންކާއަށް އެންމެގިނައިން ފަތުރުވެރިން ޒިޔާރަތްކުރި ފަސް ގައުމުގެ ތެރޭގައި ހިމެނެނީ، އިންޑިއާ، އިނގިރޭސިވިލާތް، ޗައިނާ، އޮސްޓްރޭލިއާ އަދި ބަނގްލަދޭޝް އެވެ. ލަންކާއަށް ފަތުރުވެރިން އެންމެގިނައިން ޒިޔާރަތްކުރާ 10 ޤައުމުގެ ތެރޭގައި ރާއްޖެ ހިމެނެއެވެ. ރާއްޖެ އުޅެނީ މި ލިސްޓްގެ 9 ވަނާގައެވެ. މިހިނގާ ޖޫންމަހުގެ 14 ވަނަ ދުވަހުގެ ނިޔަލަށް ރާއްޖެއިން ލަންކާއަށް ޓޫރިސްޓް ވިސާގައި 1،305 މީހުން ވަނީ ޒިޔާރަތްކޮށްފައެވެ.

ލަންކާއެކޭ އެއްގޮތަށް މިހިނގާ ޖޫންމަހުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދުވެސް ވަނީ ނިސްބަތުން ދަށަށް ގޮސްފައވެެ. އެގޮތުން ދުވާލެއްގެ މައްޗަށް ރާއްޖެއަށްވެސް މިހާރު ޒިޔާރަތްކުރާ ފަތުރުވެރިންގެ އަދަދު އުޅެނީ ތިން ހާހާއި ހަތަރު ހާހާ ދެމެދުގެ އަދަދެއްގައެވެ. ހިނގަމުން މި ދަނީ ރާއްޖޭގެ ފަތުރުވެރިކަމުގެ އެންމެ ދަށް ސީޒަނެވެ. އެހެން އަހަރުތަކާ ހިލާފަށް މިއަހަރުގެ މިދުވަސްކޮޅު ރާއްޖެއަށް ޒިޔާރަތްކުރާ ފަތުރުވެރިންގެ މަދުވުމުގެ މައިގަނޑު ސަބަބަކީ، މެދުއިރުމަތީގެ މަޝްރަހް މިވަގުތު އޮތްގޮތާއި، ވަރލްޑްކަޕް ފުޓްބޯޅަ މުބާރާތާވެސް ދިމާވުމުންކަމަށް ޓޫރިޒަމް ސިނާއަތުގައި ހަރަކާތްތެރިވާ ބައެއް ފަރާތްތަކުން ފާހަގަކުރެއެވެ.

އަވައްޓެރި ސްރީލަންކާއަށް މިހިނގާ ޖޫންމަހުގެ އެކަކުން 14 ވަނަ ދުވަހުގެ ނިޔަލަށް 54،465 ފަތުރުވެރިން ޒިޔާރަތްކުރިއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 55،353 ގައެވެ.