މިއަހަރު ރާއްޖެއަށް ޒިޔާރަތްކުރި އެއް މިލިއަން ވަނަ ފަތުރުވެރިޔާއަށް ހޫނު މަރުަހަބާއެއް ކިޔައިފިއެވެ.

ރާއްޖެއަށް ޒިޔާރަތްކުރި އެއްމިލިއަން ވަނަ ފަތުރުވެރިޔާ އައިސްފައިވަނީ މިއަދެވެ. އެއްމިލިއަން ވަނަ ފަތުރުވެރިޔާއަކީ، ސްޕެއިނަށް ނިސްބަތްވާ އަލްމުދެންޔާ އަރްތޯނިއޯ އެވެ. އޭނާ ރާއްޖެ އައިސްފައިވަނީ ޤަތަރު އެއާވޭސްގެ ފްލައިޓަކުންނެވެ. 

އެއްމިލިއަން ވަނަ ފަތުރުވެރިޔާއަށް މަރުހަބާ ކިޔުމުގެގޮތުން ވެލާނާ އިންޓަރނޭޝަނަލް އެއާޕޯޓްގައި ހައްސަ ހަރަކާތެއް ވަނީ ކުރިއަށްގެންގޮސްފައެވެ. މި ހަރަކާތުގައި ރާއްޖޭގެ މަދަނީ އުދުހުންތަކާއި ބެހޭ މިނިސްޓަރު މުޙައްމަދު އަމީން އާއި ފަތުރުވެރިކަމުގެ ސިނާއަތުގައި ހަރަކާތްތެރިވާ ބޭފުޅުންގެ އިތުރުން ޓޫރިޒަމް ސިނާއަތުގައި ޝާމިލްވާ ބައެއް ފަރާތްތަކުން ބައިވެރިވިއެވެ.

މިދިޔަ އަހަރާ އަޅާބަލާއިރު މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިލިއަން ހަމަވެފައިވަނީ ލަހުންނެވެ. މީގެ މައިގަނޑު ސަބަބަކީ މެދުއިރުމަތީގެ މަޝްރަހްގައި ހިނގާދިޔަ ހަނގުރާމައާ ގުޅިގެން އެ ސަރަހައްދުން އަންނަ ފްލައިޓްތަކުގެ އުދުހުންތައް ހުއްޓާލުލެވެ. މައިގަނޑުގޮތެއްގައި ރާއްޖެއަށް އަންނަ ފަތުރުވެރިންގެ ތެރެއިން ބޮޑު އިންސައްތައެއް ހިއްސާކުރަނީ އަރަބި ޤައުމުތަކަށް ނިސްބަތްވާ ފްލައިޓްތަކެވެ.

މިހިނގާ ޖޫންމަހުގެ 17 ވަނަ ދުވަހުގެ ނިޔަލަށް ރާއްޖެއަށް ވަނީ، 1,011,473 ފަތުރުވެރިން ޒިޔާރަތްކޮށްފައެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 1,063,894 ފަތުރުވެރިންނެވެ.