އިނާޔަތްތަކަކާއެކު ފެނަކައިން ވަކިވާން ބޭނުންވާ މުއައްޒަފުންނަށް އެފުރުސަތު ހުޅުވާލުމުން މިހާތަނަށް 97 މުއައްޒަފަކު ވަޒީފާއިން ވަކިވުމަށް އެދި ހުަށަހަޅާފައިވާކަމަށް ފެނަކައިން ބުނެފިއެވެ.

ފެނަކަ ކޯޕަރޭޝަންގެ ހިންގުން ހަރުދަނާކުރުމަށް އެކުންފުނިން ކުރަމުންގެންދާ މަސައްކަތްތަކުގެ ދަށުން އަމިއްލައަށް ވަކިވާން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ. އަމިއްލައަށް ވަކިވާން ބޭނުންވާ މުއައްޒަފުންނަށް ފެނަކައިން ފުރުސަތު ދީފައިވަނީ އިނާޔަތަކާއެކުގައެވެ. ފެނަކައިން މުއައްޒަފުންނަށް ފޮނުވި ނޯޓިހުގައި ފުރުސަތު ދީފައިވަނީ ޖޫންމަހުގެ 14 ވަނަ ދުވަހުގެ ނިޔަލަށެވެ.

ބައެއް މީޑިއާތަކަށް މައުލޫމާތު ދެއްވަމުން ފެނަކައިގެ މެނޭޖިން ޑިރެކްޓަރު މުޙައްމަދު ޢަފީފް ޙުސައިން ވިދާޅުވެފައިވަނީ، އިނާޔަތްތަކާއެކު އަމިއްލައަށް ވަޒީފާއިން ވަކިވުމަށް 97 މުއައްޒަފަކު ހުށަހެޅިކަމަށެވެ. އޭނާ ވިދާޅުވެފައިވަނީ މިއީ ފެނަކައިގެ ހިންގުން ހަރުދަނާކޮށް ދެމެހެއްޓެނިވި ގޮތެއްގައި ކުރިއަށްގެންދިއުމަށް އަޅަންްޖެހޭ މުހިންމު ފިޔަވަޅެއްކަމަށެވެ. 

ފެނަކަ އަކީ އެންމެ މުވައްޒިފުން ގިނަ އެއް ކުންފުންޏެވެ. އެ ކުންފުނީގެ ހިސާބުތައް ދައްކާގޮތުން 8,000 ވުރެ ގިނަ މުވައްޒިފުން އެބަ ތިއްބެވެ. ފެނަކަ އަކީ ސިޔާސީ ބޭނުމަށް ނުފޫޒުގެ ތެރެއިން އެންމެ ގިނަ މުވައްޒިފުން ވައްދާފައިވާ ކުންފުންޏެވެ.

އެ ކުންފުނީގައި އެއްވެސް މަސައްކަތެއް ނެތި ތިބި އެތައް މުވައްޒިފަކު ވެސް ހިމެނެ އެވެ. ބައެއް މުވައްޒިފުން އޮފީހަށް ވެސް ނިކުންނަން ނުޖެހެ އެވެ. ބައެއް މުވައްޒިފުންނަށް ކާޑު ޖަހަން ދާން ވެސް ނުޖެހެ އެވެ. ނަމަވެސް ކޮންމެ މަހަކު މުސާރަ ދެ އެވެ.