މިފަހަރުގެ ވަރލްޑްކަޕްގައި އެންމެ ހައިރާކަންކަން ގެނުވަމުން އަންނަ ކޭޕް ވާޑޭއިން އުރުގުއޭ އާ ދެކޮޅަށް ކުޅުނު މެޗުން އެޓީމް މޮޅުވިޔަނުދީ ހިފަހައްޓައިފިއެވެ.

ވަރލްޑްކަޕް ފުޓްބޯޅަ މުބާރާތުގެ މިހާހިސާބަށް އާއިރު، އެންމެ ތަފާތު ޓީމެއްގެ ގޮތުގައި ފާހަގަކުރެވުނު އެއް ޓީމަކީ އެފްރިކާ ސަރަހައްދަށް ނިސްބަތްވާ މީސްކޮޅު މަދު ކޭޕް ވާޑޭގެ ޓީމެވެ. އެޓީމް ވަނީ ޔޫރަޕްގެ ވަރުގަދަ ބާރު، ސްޕެއިންވެސް ހިފަހައްޓާފައެވެ. 

ފީފާ ވަރލްޑްކަޕް ދެފަހަރެއްގެ މަތިން ހޯދާފައިވާ އުރުގުއޭ އާ ދެކޮޅަށް އެމެރިކާގެ މިއާމީގައި ކުޅުނު މިމެޗް ނިމުނީ 2-2 ގެ ނަތީޖާއަކުންނެވެ. މިމެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް ކޭޕް ވާޑޭ އެވެ. އެއީ 21 ވަނަ މިނެޓް ތެރޭގައި ޕީނާ ކާމިޔާބުކޮށްދިން ލަނޑުންނެވެ. ކޭޕް ވާޑޭ އިން ލީޑް ނެގިތާ 21 މިނެޓްފަހުން އުރުގުއޭގެ އަރައުހޯއެވެ. ފުރަތަމަ ހާފް ނިމުމުގެ ކުރިން އުރުގުއޭގެ ކެނޮބިއޯ ވަނީ ލަނޑެއްޖަހައި މެޗްގެ ނަތީޖާ 2-1 ކަށް ބަދަލުކޮށްފައެވެ. 

މެޗްގެ ފަހު ހާފްގައި ކޭޕް ވާޑޭއިން އެއްވަރުކޮށްފައި ވަނީ އުރުގުއޭގެ ޑިފެންސްލައިނަށް ހެދުނު ގޯސްތަކެއްގެ ތެރެއިންނެވެ. މި ލަނޑު ކާމިޔާބުކޮށްދިނީ،  މަޓިއަސް އޮލިވޭރާ ދިން ނުރައްކާތެރި ބެކްޕާހެއް ސަލާމަތްކުރަން ކީޕަރު ފެނާންޑޯ މުސްލޭރާ ކުރިއަށް ނުކުތް ވަގުތު، ބަދަލު ކުޅުންތެރިޔާ ހީލިއޯ ވަރޭލާ ކީޕަރުގެ ބޯމަތިން ބޯޅަ ފޮނުވާލައިގެންނެވެ.

މެޗުގެ ފަހު ވަގުތުކޮޅު ފެނިގެންދިޔައީ ވަރަށް ފޯރިގަދަކޮށެވެ. ކޭޕް ވާޑަށް މެޗުން މޮޅުވާން ލިބުނު ރަނގަޅު ފުރުސަތެއްގައި ލަރޯސް ޑުއާޓޭ ފޮނުވާލި ބޯޅަ ސީދާވީ ކީޕަރާ ދިމާލަށެވެ. އަދި އޭގެ ފަހުން ވަރޭލާއަށް ވަނީ ލަނޑުޖަހާނޭ ރަނގަޅު ފުރުސަތެއް ލިބިފައެވެ. 

މެޗަށްފަހު މި ގްރޫޕްގެ ޕޮއިންޓް ތާވަލަށް ބަލާއިރު އެއްވަނާގައި 4 ޕޮއިންޓާއެކު އުޅެނީ ސްޕެއިން އެވެ. އުރުގުއޭ އަދި ކޭޕް ވާޑޭ އަށް އެއްވަރަކަށް ޕޮއިންޓް ލިބިފައިވާއިރު ތާވަލްގެ އެންމެ ފުލުގައި އުޅެނީ އެއް ޕޮއިންޓާއެކު ސައުދީއެވެ.