ފާއިތުވި ތިން އަހަރު ދުވަހުގެ ތެރޭގައި 70،000 އަށްވުރެ ގިނަ މީހުން ނަފްސާނީ އެހީތެރިކަން ހޯދާފައިވާ ކަމަށާ، އޭގެ ތެރެއިން ގިނަ މީހުން ފަރުވާ ހޯދާފައިވަނީ މާލެ ސަރަހައްދުން ކަމަށް ސިއްޙަތާ ބެހޭ ވަޒީރު ޤީލާ އަލީ ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން ވަޒީރު ވިދާޅުވީ، ހުޅުމާލޭގައި ނަފްސާނީ ފަރުވާއަށް ޚާއްސަކޮށްގެން 'މެންޓަލް ހެލްތު' ހޮސްޕިޓަލެއް އެޅުމަށް ސަރުކާރުން ނިންމާފައިވާ ކަމަށާ، އެކަމަށްޓަކައި 10،000 އަކަފޫޓުގެ ބިމެއް ކަނޑއަޅާފައިވާ ކަމަށެވެ.
މިއާއެކު ވަޒީރު ވަނީ، މާލެ ސަރަހައްދުގައި މެންޓަލް ހެލްތު ހޮސްޕިޓަލެއް އެޅުމަށް ސަރުކާރުން ނިންމި ސަބަބުތަކުގެ މައްޗަށް އަލިއަޅުވާލައްވާފައެވެ.
ރާއްޖޭގެ ތަފާސް ހިސާބުތަކުން ދައްކާގޮތުގައި 2023 ވަނައަހަރުން ފެށިގެން 2025 ގެ ނިޔަލަށް 3 އަހަރުގެ ތެރޭގައި 70،000 އަށްވުރެ ގިނަ ފަރާތްތައް ސައިކޭޓްރިސްޓިކް އެހީތެރިކަން ހޯދާފައިވާ. ސައިކޭޓްރިސްޓިކް ކޮންސަލްޓޭޝަން ހޯދާފައިވާ ވާހަކަ މި ދަންނަވާލީ. މީގެ ތެރެއިން 45،000 މީހުން ސިއްހީ ފަރުވާ ހޯދާފައިވަނީ މާލެ ސަރަހައްދުން.
ވަޒީރު ޤީލާ އަލީ
ވަޒީރު އިތުރަށް ވިދާޅުވީ، މެންޓަލް ހެލްތު ހޮސްޕިޓަލަކީ ވަކިން ޚާއްސަ ފަރުވާތަކެއް ދެވޭ ތަނެއް ކަމަށާ އެކަމަށްޓަކައި، ކަމުގެ ޢިލްމާއި ތަޖުރިބާހުރި ސްޕެޝަލިންސްޓުން ބޭނުންވާ ކަމަށެވެ. އަދި މިވަގުތު އެފަދަ ސްޕެޝަލިސްޓުން އެންމެ ގިނައީ މާލެ ސަރަހައްދުގައިކަން ވަޒީރު ފާހަގަކުރެއްވިއެވެ.
މެންޓަލް ހެލްތު ހޮސްޕިޓަލް އަޅަންވާނީ އެކަމަށް ބޭނުންވާ ހރުިހާ ވަސީލަތެއް އެންމެ ފަސޭހައިން ލިބެން ހުރި ސަރަހައްދެއްގައި ކަމަށާ، މިވަގުތު އެ ވަސީލަތްތައް ލިބެން ހުރީ މާލެ ސަރަހައްދުގައި ކަމަށް ގީލާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
