ވޭތުވެދިޔަ ހަފްތާ އެކަނިވެސް ހިމަބިހީގެ ދެ ކޭސް ފެނިފައިވާކަމަށް ހެލްތް ޕްރޮޓެކްޝަން އޭޖެންސީ، އެޗްޕީއޭއިން ހާމަކޮށްފިއެވެ.

ހިމަބިހި ނުވަތަ މީސްލްސް އާ ބެހޭ ފަހުގެ މައުލޫމާތު ހާމަކުރުމަށް އެކްސްގައި ކުރި ޕޯސްޓެއްގައި އެޗްޕީއޭއިން ބުނީ މިއަހަރު ރާއްޖޭގައި މިހާތަނަށް 22 މީހަކަށް ހިމަބިހި ޖެހިފައިވާކަމަށެވެ.

އެގޮތުން މިދިޔަ ހަފްތާ އެކަނިވެސް ދެ މީހަކަށް ހިމަބިހި ޖެހުނުކަމަށެވެ. އެ ދެމީހުންވެސް ފެނިފައިވަނީ މާލެ ސަރަހައްދުންކަމަށް އެޗްޕީއޭއިން ބުންޏެވެ. މިހާތަނަށް މި ބަލި ޖެހުނު ގިނަ މީހުންގެ ތެރޭގައި ހިމެނެނީ ދިވެހިނެވެ. އެޗްޕީއޭގެ މައުލޫމާތަށް ބަލާއިރު ގިނައިން ހިމަބިހި ޖެހިފައިވަނީ 18 އަހަރުން މަތީގެ މީހުންނަށެވެ. 

އެޗްޕީއޭއިން މީގެ ކުރިން އާއްމުކުރި މައުލޫމާތު ތަކަށް ބަލާއިރު، ހިމަބިހީގައި މިހާތަނަށް 489 ކޮންޓެކްޓުން ފާހަގަކުރެވި މީގެ ތެރެއިން އެކްޓިވް 88 ކޮންޓެކްޓުން ދަނީ މޮނިޓާ ކުރަމުންނެވެ.

ބައްޔަށް ޕޮޒިޓިވްވި މީހުންގެ ކޮންޓެކްޓުންގެ ތެރެއިން ވެކްސިން ދެ ޑޯޒް ފުރިހަމަކޮށްފައިނުވާ މީހުންނަށް ވެކްސިން ދިނުމުގެ މަސައްކަތް ދަނީ ކުރަމުން ކަމަށާ މިހާތަނަށް 220 ކޮންޓެކްޓުންނަށް ވަނީ ވެކްސިން ދީފައި ކަމަށް އެޗްޕީއޭ އިން ވަނީ ބުނެފައެވެ.

ހިމަބިހި ފެތުރުން ކޮންޓްރޯލް ކުރުމުގެ ގޮތުން ހާއްސަ ވެކްސިން ކެމްޕެއިން މިހާރު ވަނީ ފަށާފަ އެވެ. އެގޮތުން ވެކްސިން ޑޯޒް ފުރިހަމަ ކޮށްފައިނުވާ ކުދީންނަށް ދަނީ ވެކްސިން ދެމުންނެވެ. އަދި ސިއްހީ ހިދުމަތްތެރީންގެ ތެރެއިން 1118 މީހަކަށް ވަނީ ވެކްސިން ދީފައެވެ.