ތުރުކިއޭ އަތުން ބަލިވިނަމަވެސް ގްރޫޕްގެ އެއްވަނަ ޓީމްގެ ގޮތުގައި މުބާރާތް ބާއްވާ އެއްޤައުމު ކަމަށްވާ އެމެރިކާއިން ނޮކްއައުޓް ބުރުގެ ޖާގައެއް ހޯދައިފިއެވެ.

ވާދަވެރި ކުޅުމެއް ފެނިގެންދިޔަ މި މެޗްގައި އެމެރިކާގެ މައްޗަށް ތުރުކިއޭ ކުރި ހޯދީ 3-2 ގެ ނަތީޖާއަކުންނެވެ. މިމެޗްގައި އެންމެ ފުރަތަމަ ލަނޑު ޖަހައި ކުރި ހޯދީ އެމެރިކާ އެވެ. އެއީ މެޗް ފަށައިގެން ތިންވަނަ މިނެޓް ތެރޭގައި ޓްރަސްޓީ ޖަހައިދިން ލަނޑުންނެވެ. އެމެރިކާއިން ލިޑް ނަގާފައިވަނިކޮށް ތުރުކިއޭގެ ގުލާ ވަނީ 10 ވަނަ މިނެޓް ތެރޭގައި ލަނޑެއް ކާމިޔާބުކޮށް މެޗްގެ ނަތީޖާ ހަމަހަމަކޮށްފައެވެ. އަދި ފުރަތަމަ ހާފް ނިމުމުގެ ކުރިން ތުރުކިއޭގެ ޔިލްމާޒް ވަނީ ލަނޑެއް ޖަހައި މެޗްގެ ނަތީޖާ 2-1 ކަށް ބަދަލުކޮށްފައެވެ.

ދެވަނަ ހާފް ފަށައިގެން ފަސް މިނެޓް ނުވެ އެމެރިކާގެ ބަހަލްޓާ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައިވަނިކޮށް މެޗުން ތުރުކިއޭ މޮޅުވިލަނޑު އެޓީމަށް ޖަހައިދިނީ، މެޗްގެ އިތުރުވަގުތުގެ ކުޅުމުގެ ތެރޭގައި އައިހާނެވެ.

މި ގްރޫއްޕުގެ އަނެއް މެޗްގައި މިއަދު ޕެރަގުއޭ އާއި އޮސްޓްރޭލިއާ ބައްދަލުކުރިމެޗް ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. މެޗް އެއްވަރުވިނަމަވެސް އެމެރިކާގެ ފަހަތުން އޮސްޓްރޭލިއާ އަދި ޕަރަގުއޭ ވަނީ އަނެއްބުރުގެ ޖާގަ ހޯދާފައެވެ.