ހައިވޭގައި ދުއްވާފައި ދިޔަ ކާރެއް ޕިކަޕެއްގެ ފަހަތުގައި ޖެހި، ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުންގެ މީޑިއާ އޮފިޝަލް 'ވޮއިސް' އަށް މަޢުލޫމާތު ދެއްވަމުން ވިދާޅުވީ، ހައިވޭ، މާލެއިން ހުޅުމާލެއަށް ދަތުރު ކުރާ ފަޅީގައި އެކްސިޑެންޓެއް ހިނގައިގެން އުޅޭކަމުގެ މަޢުލޫމާތު މިއަދު ފަތިހު 03:11 އެހައިކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
އަދި މި އެކްސިޑެންޓް ހިނގާފައިވަނީ ދުއްވާފައި ދިޔަ ކާރެއް ޕިކަޕެއްގެ ފަހަތުގައި ޖެހި، ޕިކަޕު ކޮންޓްރޯލްނުވެގޮސް ހައިވޭގެ ފެންސާއި މަގުބައްތި ހޮޅިދަނޑިއެއްގައި ޖެހިގެން ކަމަށްވެސް ވިދާޅުވިއެވެ.
އޮފިޝަލް އިތުރަށް ވިދާޅުވީ، މި އެކްސިޑެންޓްގައި ހަތަރު މީހަކަށް ކުދި އަނިޔާތައް ލިބިފައިވާއިރު، އެކްސިޑެންޓްވި ދެ އުޅަނދަށްވެސް ވަނީ އެކިވަރުގެ ގެއްލުންތައް ލިބިފައިވާ ކަމަށެވެ.
މި އެކްސިޑެންޓްގެ މައްސަލަ ފުލުހުން ގެންދަނީ ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
