އެމެރިކާގެ ބޮޑެތި ޓެކް ކުންފުނިތަކަށް އަމާޒުކޮށް ޑިޖިޓަލް ސާވިސް ޓެކްސް ނަގާ ކޮންމެ ޔޫރަޕް ޤައުމަކާ ދެކޮޅަށް ސައްތައިން ސައްތަ ޓެރިފް އެޅާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދީފިއެވެ.

ޓްރަމްޕް އޭނާގެ ޓްރުތް ސޯޝަލް ޕްލެޓްފޯމުގައި ލިޔުނު ޕޯސްޓެއްގައި ބުނީ ޔޫރަޕުގެ ގިނަ ޤައުމުތަކަކުން އެފަދަ ޓެކްސްއެއް ނެގުމާ މެދު ވިސްނަމުންދާ ކަމަށާއި ބައެއް ޤައުމުތައް އެކަން ތަންފީޒުކުރުމާ ގާތްވެފައިވާ ކަމަށެވެ. އެފަދަ ޓެކްސްއެއް ނަގައިފި ކޮންމެ ޤައުމަކާ ދެކޮޅަށް ވަގުތުން ޓެރިފް އެޅޭނެ ކަމަށާއި އެ ޓެރިފްތަކުން ދެ ޤައުމުގެ ދެމެދުގައި ހުރި ވިޔަފާރީގެ އެއްބަސްވުންތައްވެސް ބާޠިލުވާނެ ކަމަށް އޭނާ އިންޒާރު ދިނެވެ.

"އެފަދަ ޓެކްސްއެއް ނަގާ ކޮންމެ ޤައުމަކާ ދެކޮޅަށް އެ ޤައުމަކުން އެމެރިކާއަށް ފޮނުވާ ހުރިހާ މުދަލަކުން ސައްތައިން ސައްތަ ޓެރިފް ވަގުތުން ނެގެން ފެށޭނެ" ޓްރަމްޕް ލިޔެފައިވެއެވެ.

މި އިންޒާރުގެ ސަބަބުން މިހާރުވެސް ޑިޖިޓަލް ސާވިސް ޓެކްސް ނަގަމުންދާ ޤައުމުތަކަށް ކުރާނެ އަސަރު ސާފެއް ނޫނެވެ.

އިނގިރޭސިވިލާތުން 2020 ވަނަ އަހަރު ތައާރަފުކުރި ދެ އިންސައްތައިގެ ޑިޖިޓަލް ސާވިސް ޓެކްސް ނެގެނީ ދުނިޔޭގެ ފެންވަރުގައި 500 މިލިއަން ޕައުންޑަށް ވުރެ މައްޗަށް ޑިޖިޓަލް އާމްދަނީ ލިބޭ އަދި އިނގިރޭސިވިލާތުގައި 25 މިލިއަން ޕައުންޑަށް ވުރެ މަތީ އާމްދަނީއެއް ހޯދާ ބޮޑެތި ސާޗް އިންޖީންތަކާއި ސޯޝަލް މީޑިއާ ޕްލެޓްފޯމުތަކާއި އޮންލައިން މާކެޓްޕްލޭސްތަކުންނެވެ.

މި ޓެކްސް އެޕަލް ގޫގުލް މެޓާ އަދި އެމެޒޯން ފަދަ އެމެރިކާގެ ބޮޑެތި ޓެކް ކުންފުނިތަކުން ނަގައެވެ. އިނގިރޭސި ޓްރެޝަރީގެ ހިސާބުތައް ދައްކާ ގޮތުން 2024-25 ވަނަ މާލީ އަހަރު މި ޓެކްސުން 800 މިލިއަން ޕައުންޑަށް ވުރެ ބޮޑު އާމްދަނީއެއް ލިބިފައިވެއެވެ. އޭގެ ކުރީ އަހަރު މި ޢަދަދު އޮތީ 678 މިލިއަން ޕައުންޑުގައެވެ.

ޑިޖިޓަލް ސާވިސް ޓެކްސްއަކީ އެމެރިކާގެ ކުންފުނިތަކާ ދެކޮޅަށް ނާއިންސާފުން ނެގޭ ޓެކްސްއެއް ކަމަށް ޓްރަމްޕް ތަކުރާރުކޮށް ބުނެފައިވެއެވެ. މިދިޔަ އެޕްރީލް މަހުވެސް ޓްރަމްޕް ބުނީ އިނގިރޭސިވިލާތުން އެމެރިކާގެ ޓެކް ކުންފުނިތަކުން ނަގާ ޓެކްސްގެ ސަބަބުން "ބޮޑު ޓެރިފެއް" ކުރިމަތިވެދާނެ ކަމަށެވެ.