ދެކުނު އެފްރިކާ ބަލިކޮށް ވަރލްޑްކަޕް ގަދަ 16 ގެ ޖާގަ މުބާރާތް ބާއްވާ އެއްޤައުމު ކެނެޑާއިން ހޯދައިފިއެވެ.
ނޮކްއައުޓް ބުރުގެ ފުރަތަމަ މެޗްގައި ކެނެޑާ އާއި ދެކުނު އެފްރިކާ ބައްދަލުކުރި މިމެޗް ކެނެޑާ ކާމިޔާބުކުރީ 1-0 ގެ ނަތީޖާއިންނެވެ. މެޗްގައި ފެނިގެންދިޔަ ހަމައެކަނި ލަނޑު ކެނެޑާއަށް ކާމިޔާބުކޮށްދިނީ ފަހުވަގުތުގެ ތެރޭގައި ސްޓީވަން އެސްޓާކިއޯ އެވެ.
މެޗްގެ އޮއިވަރުދިޔަގޮތުން ގިނަ މީހުން ހީކޮށްގެން ތިބީ މިމެޗްގެ ނަތީޖާ ނެރެންޖެހޭނީ ޕެނަލްޓީއަށް ގޮސްގެންކަމަށެވެ. މެޗްގައި ދެކުނު އެފްރިކާގެ ޑިފެންސް ވަރަށް ވަރުގަދަކޮށް ފެނިގެންދިޔައިރު، ކެނެޑާގެ ހަމަލާތައް ހުއްޓުވުމުގައި ދެކުނު އެފްރިކާ ފެނުނީ ވަރަށް ވަރުގަދަކޮށެވެ. އެގޮތުން ކެނެޑާގެ މޮއިސް ބޮމްބިޓޯ ބޮލުން ފޮނުވާލި ހަމަލާއެއް އޯބްރީ މޮޑީބާ ގޯލުގެ ރޮނގުމަތިން ސަލާމަތްކުރިއިރު، ޖޮނަތަން ޑޭވިޑަށް ލިބުނު ރަނގަޅު ފުރުސަތެއް އެމްބެކެޒެލީ އެމްބޮކާޒީ ވަނީ ހުށިޔާރުކަމާއެކު ހުއްޓުވާފައެވެ.
މެޗުގެ ފުރަތަމަ ހާފު ނިމެން އުޅެނިކޮށް ކެނެޑާގެ ރިޗީ ލާރިއާ އަށް އޭރިއާ ތެރެއިން ކުރި ފައުލަކާ ގުޅިގެން ކެނެޑާއިން ޕެނަލްޓީއަކަށް އެދުނު ނަމަވެސް، ވީއޭއާރް ބެލުމަށްފަހު ރެފްރީ ނިންމީ އެއީ ޕެނަލްޓީއެއް ނޫން ކަމަށެވެ. މި ނިންމުމާ މެދު ހިތްހަމަނުޖެހިގެން ކެނެޑާގެ ކޯޗު މާޝް ރެފްރީންނާ ދިމާލަށް ދިއުމުން، އޭނާ ދުރުކުރަން ޖެހުނީ އެ ޓީމުގެ ކުޅުންތެރިންނަށެވެ
މުބާރާތުގެ ކުއާޓާ ފައިނަލުގައި ކެނެޑާ ބައްދަލުކުރަން ޖެހޭނީ މޮރޯކޯ ނުވަތަ ނެދަލޭންޑްސް ބައްދަލުކުރާ މެޗުން މޮޅުވާ ޓީމަކާއެވެ.
Advertisement
This content is created and paid for by advertisers and does not involve Voice Journalists
