ދިވެހިރާއްޖޭގެ ކަނޑުގެ ސަރަހައްދުން މަސްބޭނި އަވައްޓެރި ސްރީލަންކާގެ މަސްބޯޓް ދައުލަތަށް ނަގައި ޖޫރިމަނާ ދައްކަން ސިވިލްކޯޓުން އަމުރުކޮށްފިއެވެ.
މި މައްސަލާގައި ދައުވާ ލިބޭ ސްރީލަންކާގެ މަސްބޯޓު ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަދެ މަސްވެރިކަން ކުރުމުގައި އުޅެނިކޮށް އެމްއެންޑީއެފުން އެ ބޯޓު އަތުލައިގަނެފައިވަނީ މިދިޔަ އަހަރުގެ ޖެނުއަރީމަހުގެ ތެރޭގައެވެ. ޖަޔަން ޕުތާ 2 ނަމަކަށް ކިޔާ މި ބޯޓު ރާއްޖެ ސަރަހައްދުން ގަވާއިދާ ހިލާފަށް މަސްވެރިކަން ކުރިކަން ވަނީ ސާބިތުވެފައެވެ.
އެގޮތުން އެ ބޯޓު ކޯސްޓްކާޑުގެ ބެލުމުގެ ދަށަށް ގެނެވުނުއިރު އޭގައި މަހާއި މަސްބޭނުމަށް ބޭނުންކުރި އާލާތްތައް ހުއްޓެވެ. ދިވެހިރާއްޖޭގެ މަސްވެރިކަމުގެ ގާނޫނު ބުނާގޮތުން ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ މަސްވެރިކަންކޮށްފިކަން ސާބިތުވެއްޖެނަމަ، އެ ކުށްކުރި އުޅަނދުގެ ވެރިފަރާތް އަދި އޮޕަރޭޓަރުވެސް ހިމެނޭހެން ވަކިވަކިން އެއިން ކޮންމެ މީހެއް 400،000 ރުފިޔާއިން ޖޫރިމަނާކުރުމުގެ ބާރު ކަމާބެހޭ މިނިސްޓްރީއަށް ލިބިދީފައި ވެއެވެ.
ސިވިލްކޯޓުން އިއްޔެ ކުރި މި ހުކުމްގައި ވަނީ ލަންކާގެ އެ މަސްބޯޓު ގަވާއިދާ ހިލާފަށް މަސްވެރިކަން ކޮށްފައިވާތީވެ، ބޯޓުގެ ވެރިފަރާތް އޭޖޭވީޑީ ސިލްވާ 600،000 ރުފިޔާއިން ޖޫރިމަނާކޮށް މިއަދުގެ ދޭއް ޖެހުމުގެ ކުރިން މަސްވެރިކަމާ ބެހޭ ވުޒާރާއަށް އެ ފައިސާ ދެއްކުމަށް އަމުރުކޮށްފައެވެ. މީގެ އިތުރުން އެ ބޯޓު ދިވެހި ދައުލަތަށް ނެގުމަށްވެސް ވަނީ އަމުރުކޮށްފައެވެ. ސިވިލްކޯޓުން މި ގަޒިއްޔާ ނިންމާފައިވަނީ ދައުވާ ލިބޭ ފަރާތުގެ ޢައިރު ހާޒިރުގައެވެ.
Advertisement
This content is created and paid for by advertisers and does not involve Voice Journalists
