ރާއްޖޭގައި ހިމަބިހި (މީސަލްސް) ފެތުރެމުންދާ މި ދަނޑިވަޅުގައި، ބަލި ޖެހުނު މީހުންގެ އަދަދު 72 އަށް އަރާފައިވާ ކަމަށާއި، ބަލި ފެތުރެން މެދުވެރިވާ މައިގަނޑު ސަބަބަކީ ވެކްސިންގެ ދެ ޑޯޒް ފުރިހަމަނުކުރުން ކަމަށް ކުޑަކުދިންގެ ޚާއްސަ ޑޮކްޓަރު އަހުމަދު ފައިސަލް ވިދާޅުވެއްޖެއެވެ.

ޑރ. ފައިސަލް ހާމަކުރެއްވި ގޮތުގައި، މިއަހަރު ހިމަބިހީގެ 72 އަށްވުރެ ގިނަ ކޭސް ފެނިފައިވެއެވެ. މީގެ ތެރެއިން ހަތަރު ކުޑަކުދިން ފިޔަވައި ދެން ތިބި އެންމެންނަކީ ޒުވާން އުމުރުގެ މީހުންނެވެ. ޚާއްސަކޮށް 15 އަހަރާއި 35 އަހަރާ ދެމެދުގެ އުމުރުފުރާގެ މީހުން ވެކްސިންގެ ދެ ޑޯޒް ހަމަކުރުމަށް ޑޮކްޓަރު ވަނީ އިލްތިމާސް ކުރައްވާފައެވެ.

"ހިމަބިހި އެތެރެވުމުން ފެތުރެން ދިމާވަނީ މިހެންވެ. އެއީ (ވެކްސިންގެ) ދެ ޑޯޒް ހަމަނުވާ ފަރާތްތައް. މިއީ ބަލި ޖެހުމުގެ ފުރުސަތު ބޮޑު އާބާދީއެއް،" ޑރ. ފައިސަލް ވިދާޅުވިއެވެ.

މި ސަރަހައްދުގެ ގައުމުތަކުގެ ތެރެއިން ހިމަބިހި އެންމެ ގަދަޔަށް ފެތުރޭ ގައުމުތަކުގެ ތެރޭގައި ރާއްޖެ ހިމެނިފައިވާކަން ފާހަގަކުރައްވަމުން، ޑޮކްޓަރު ވިދާޅުވީ އިންޑިއާ، ބަންގްލަދޭޝް، ސްރީލަންކާ، ބުރުމާ އަދި ނޭޕާލަކީ މި ބަލި އާންމު ގައުމުތައް ކަމަށެވެ.

އެހެންކަމުން އެ ގައުމުތަކުން ރާއްޖެއަށް މަސައްކަތްކުރަން އަންނަ މީހުންނަށް ވިސާ ދިނުމުގެ ކުރިން ވެކްސިން ފުރިހަމަކޮށްފައިވޭތޯ ބެލުމަށާއި، ރާއްޖެ އަންނަ ފަތުރުވެރިންގެ ކިބައިން ފެންނަ އަލާމާތްތަކަށް ސަމާލުވުމަށް ލަފާދެއްވާފައިވެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، ބައްޔަށް ޕޮޒިޓިވްވި މީހުންގެ ތެރޭގައި ގިނައީ 18 އަހަރުން މަތީގެ މީހުންނެވެ. މިހާތަނަށް ޖުމްލަ 543 ކޮންޓެކްޓުން ފާހަގަކުރެވިފައިވާއިރު، އޭގެ ތެރެއިން 173 ކޮންޓެކްޓުން މިހާރުވެސް ދަނީ މޮނިޓާ ކުރެވެމުންނެވެ.

ބަލިން ރައްކާތެރިވުމަށް އެޗްޕީއޭއިން ދޭ އިރުޝާދުތައް:

ބައްޔަށް ޝައްކުވެގެން ޓެސްޓެއް ހަދައިފިނަމަ، ނަތީޖާ ލިބެންދެން އެކަހެރިވެގެން ހުރުން.

ހުން އައުމާއެކު ގައިގައި ރަތް ބިހި ނެގުން ނުވަތަ ރޯގާގެ އަލާމާތެއް ހުރިނަމަ، މީހުން އެއްވެ އުޅޭ ތަންތަނަށް ނުދިއުން.

ބަލީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުން.

ހޮސްޕިޓަލަށް ދާއިރު، އެހެން މީހުންނަށް ބަލި ފެތުރުނަ ނުދިނުމަށްޓަކައި މާސްކު އެޅުން.

ހިމަބިހިން ރައްކާތެރިވުމަށް އޮތް އެންމެ މުހިންމު ފިޔަވަޅަކީ ވެކްސިންގެ ދެ ޑޯޒް ފުރިހަމަކުރުން ކަމަށް ބުނެ، އެޗްޕީއޭ އިން މިހާރު ވަނީ ވެކްސިން ދިނުމުގެ ޕްރޮގްރާމެއްވެސް ފަށާފައެވެ.