ސްރީލަންކާގެ ނެގޮމްބގެ ޖަލެއްގައި ޤައިދީންގެ ދެ ގްރޫޕެއްގެ ދެމެދުގައި ހިނގި ހަމަނުޖެހުންތަކެއްގައި 25 މީހުން މަރުވެ ގާތްގަނޑަކަށް 100 މީހުންނަށް އަނިޔާވެއްޖެއެވެ.
ފުލުހުންގެ ދެ މަސްދަރަކާއި ހޮސްޕިޓަލުގެ މަސްދަރަކާ ހަވާލާދީ ރޮއިޓާޒް ބުނީ މި ހަމަނުޖެހުންތައް ފެށިފައިވަނީ އާދީއްތަ ދުވަހު ކަމަށެވެ. ހަމަނުޖެހުން ހިނގީ ޙުކުމް ތަންފީޒު ކުރަމުންދާ ޤައިދީންނާއި ބަންދުގައި ތިބި މީހުންނާ ދެމެދުގައެވެ. ނެގޮމްބޯ އޮންނަނީ ވިޔަފާރީގެ ވެރިރަށް ކޮލަމްބޯއިން ގާތްގަނޑަކަށް 35 ކިލޯމީޓަރު އުތުރުގައެވެ. ހަމަނުޖެހުން ފެށުނު ސީދާ ސަބަބު އަދި ސާފެއް ނުވެއެވެ.
ފުލުހުންގެ މަސްދަރުތަކާ ހަވާލާދީ ރޮއިޓާޒް ބުނީ ޖަލުގެ ބައެއް ސަރަޙައްދުތައް އަދިވެސް ސާފުކުރުމުގެ މަސައްކަތް ކުރިއަށް ގެންދާ ކަމަށާއި މަރުވި މީހުންނާއި އަނިޔާވި މީހުންގެ ޢަދަދު ކަށަވަރު ކުރުމުގެ މަސައްކަތް ކުރަމުންދާ ކަމަށެވެ.
"ފުލުހުންނަށް އެހީތެރިކަން ފޯރުކޮށްދިނުމަށް ސިފައިންގެ ކިބައިން ވަނީ އެދިފައި ނަމަވެސް މި ވަގުތު ސިފައިން ތިބީ ތައްޔާރީ ހާލަތުގައި" ކަމަށް ސިފައިންގެ ތަރުޖަމާނު ބްރިގޭޑިއާ ވަރުނާ ގަމާގެ ރޮއިޓާޒްއަށް ވިދާޅުވިއެވެ.
ޑެރާނާ ޓީވީން ދައްކާ މަންޒަރުތަކުން ފެންނަ ގޮތުގައި ޖަލުގެ ގޭޓު ކައިރީގައި ގިނަ ޢަދަދެއްގެ ފުލުހުން ހަރަކާތްތެރިވެފައިވެއެވެ. އަދި އަނިޔާވި ޤައިދީން ގޮވައިގެން ފުލުހުންގެ ބަހެއް ޖަލުން ނުކުތް މަންޒަރު ވެސް ފެނިފައިވެއެވެ.
Advertisement
This content is created and paid for by advertisers and does not involve Voice Journalists
