ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ކުޑަކުދިންނާއި ޒުވާނުންނަށް އަމާޒުކޮށް ބާއްވާ "އެމްއެންޔޫ ލާނިން ފެސްޓިވަލް (ހަމަސާ)" ގެ ޕައިލެޓް ފޭސްގައި ބައިވެރިވުމުގެ ފުރުޞަތު ހުޅުވާލައިފިއެވެ.

މި ޕްރޮގްރާމަކީ އެމްއެންޔޫގެ ފުރާތާ ޕްރޮގްރާމާއި ލައިފްލޯންގ ލާނިން ޕޮލިސީގެ ދަށުން ތައްޔާރުކޮށްފައިވާ ވޯކްޝޮޕް ސީރީޒެކެވެ. ރެޖިސްޓްރޭޝަން ކުރިއަށް ދާނީ 16 ޖުލައި 2026 ގެ ނިޔަލަށެވެ. ޕްރޮގްރާމް ހިންގުމަށް ހަމަޖެހިފައި ވަނީ 19 ޖުލައި އިން 23 ޖުލައި 2026 އަށެވެ.

މި ޕްރޮގްރާމް ފަރުމާކޮށްފައި ވަނީ ކުޑަކުދިންނާއި ޒުވާނުންގެ ޒާތީ ތައުލީމީ އަދި އިޖުތިމާޢީ ތަރައްޤީއަށް މަގުފަހިކޮށްދިނުމަށެވެ. މި ޕްރޮގްރާމުގެ ބައިވެރިން ތިން ކެޓެގަރީއަކަށް ބަހާލާނެއެވެ. އެއީ ކެޓެގަރީ އޭ (9-12 އަހަރު) ކެޓެގަރީ ބީ (13-15 އަހަރު) އަދި ކެޓެގަރީ ސީ (16-18 އަހަރު) އެވެ.

މި ފެސްޓިވަލްގައި ހިމެނޭ މައިގަނޑު ދާއިރާތަކުގެ ތެރޭގައި ސްޓޯރީޓެލިން އިން އެކްޝަން ވާހަކައިގެ ދުނިޔެ އިސްލާމީ އަގުތަކާއި އަދަބުތައް ރޮބޮޓިކްސް ހިސާބު ސައިންސް ދުޅަހެޔޮކަމާއި ރެސިލިއެންސް އަދި ކިޔެވުމުގެ ހުނަރުތައް ހިމެނެއެވެ. ކޮންމެ ވޯކްޝޮޕް ސެޝަނެއް ފަރުމާކޮށްފައި ވަނީ ޢަމަލީ ހަރަކާތްތަކާއި ގުޅިގެން ކިޔެވުމާއި ހޯދައި ބެލުމުގެ މައްޗަށެވެ. ސެޝަންތައް ހިންގާނީ އެމްއެންޔޫގެ އެކެޑެމިކް މުވައްޒަފުންނެވެ.

ޕްރޮގްރާމުގެ ވޯކްޝޮޕް ސެޝަންތައް ކޮންމެ ދުވަހެއްގެ ހެނދުނު 8:15 އިން މެންދުރު ފަހު 3:30 އާ ހަމައަށް ކުރިއަށް ގެންދާ ގޮތަށް ވަނީ ހަމަޖެހިފައެވެ. ޕްރޮގްރާމް ނިންމުމުގެ ރަސްމިއްޔާތު ބޭއްވުމަށް ހަމަޖެހިފައި ވަނީ 23 ޖުލައި 2026 ގައެވެ. ބެލެނިވެރިންނަށް ރެޖިސްޓްރޭޝަން ބަންދުވުމުގެ ކުރިން ބައިވެރިން ރެޖިސްޓާ ކުރުމަށް އެ ޔުނިވާސިޓީން ވަނީ އިލްތިމާސްކޮށްފައެވެ.