އެމެރިކާއިން ވަޢުދުތަކާ ޚިލާފުވަމުންދާހާ ހިނދަކު އެއްބަސްވުމުގެ ދަށުން ޢަމަލުކުރަން ޖެހޭ ކަންކަން ނުކުރާނެ ކަމަށް އީރާނުން ބުނެފިއެވެ.
މި އިންޒާރު ދިނީ ތެހެރާންގައި ބޭއްވި ނޫސްވެރިންގެ ބައްދަލުވުމުގައި އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޤާއީއެވެ.
ބަޤާއީ ވިދާޅުވި ގޮތުގައި ފެށުނީއްސުރެވެސް އީރާނުގެ ސްޓޭންޑް ބަދަލެއް ނުވެއެވެ.
"ފެށުނީއްސުރެ ބުނަމުން އައީ 'ވަޢުދުގެ ބަދަލުގައި ވަޢުދު' ދިނުމުގެ ވާހަކަ. އެމެރިކާއިން ވަޢުދުތަކަށް ނުފުއްދާނަމަ އަޅުގަނޑުމެންވެސް އަޅުގަނޑުމެންގެ ވަޢުދުތައް ފުއްދާނަން" ސެމީ-އޮފިޝަލް ތަސްނިމް ނިއުސް އޭޖެންސީއަށް ދެއްވި ބަސްދީގަތުމުގައި ބަޤާއީ ވިދާޅުވިއެވެ.
މީގެ އިތުރުން އެއްބަސްވުމުގެ ތަފާތު ބައިތަކަށް ތަފާތު ބަހަނާތައް ދައްކައިގެން އެމެރިކާއިން ފުށުއަރުވަމުން ގެންދާ ކަމަށްވެސް އޭނާ ދެންނެވިއެވެ.
ބަޤާއީ ވިދާޅުވީ މި އެއްބަސްވުން މިހާރު "ކްރައިސިސް ފޭސް" އަކަށް ވަދެފައިވާ ކަމަށެވެ.
"އެމެރިކާއިން ވަޢުދުތަކާ ޚިލާފްވަމުންދާހާ ހިނދަކު އިސްލާމިކް ރިޕަބްލިކް އޮފް އީރާނުންވެސް ބަދަލުގައި ކުރަން އެއްބަސްވި ކަންކަން ނުކުރާނެ" އޭނާ ވިދާޅުވިއެވެ.
މީގެ އިތުރުން ސަރަޙައްދުގައި ހަނގުރާމައިގެ ހަރަކާތްތައް ބޮޑުވަމުންދިޔަ ނަމަވެސް ޑިޕްލޮމަސީއަކީ "މިހާރުވެސް ބޭނުންކުރެވޭ ވަސީލަތެއް" ކަމުގައި ބުނެ ގައުމީ މަސްލަޙަތު ރައްކާތެރިކުރުމަށް ކޮންމެ ވަސީލަތެއްވެސް ބޭނުންކުރައްވާނެ ކަމަށް ބަޤާއީ ވިދާޅުވިއެވެ. އީރާނުން ފަހަކަށްއައިސް ގަތަރާއި ޢުމާނުގެ ބޭފުޅުންނާ ބައްދަލުކޮށްފައިވާ ކަމަށާއި ޕާކިސްތާނާވެސް ގުޅުން ބާއްވަމުން ގެންދާ ކަމަށް އޭނާ ފާހަގަކުރެއްވިއެވެ.
ސަރަޙައްދުގެ އެއްވެސް ޤައުމަކަށް އީރާނުން ޙަމަލާދީފައި ނުވާނެ ކަމަށާއި ދޭން ނުވެސް ދާނެ ކަމަށް ބަޤާއީ ވިދާޅުވިއެވެ. އީރާނުގެ ސަރަޙައްދީ ފިޔަވަޅުތައް އަމާޒުކުރީ އީރާނަށް ޙަމަލާދިނުމަށް އެމެރިކާ ބޭނުންކުރާ ބޭސްތަކާއި ސަޕޯޓިންގ ފެސިލިޓީސްއަށް އެކަނި ކަމަށާއި ފަހަރެއްގައި އީރާނަށް ޙަމަލާދިނުމަށް ބޭނުންކުރެވޭ ކޮންމެ ސަރަޙައްދެއް ނުވަތަ ޤައުމެއްގެ ބައެއްވެސް އީރާނުގެ ދިފާޢީ ފިޔަވަޅުތަކުގެ ދަށަށް ވަންނާނެ ކަމަށް އޭނާ ބުންޏެވެ.
ސްޓްރެއިޓް އޮފް ހޮރްމުޒުގައި ވިޔަފާރި ބޯޓުތަކަށް ދިން ޙަމަލާތަކާ ގުޅިގެން އީރާނުގެ ފެސިލިޓީސްތަކަށް އެމެރިކާއިން ދިން ޙަމަލާތަކާއެކު ތެހެރާނާއި ވޮޝިންޓަން ދެމެދު ފިއްތުންތައް ބޮޑުވަމުން ދިޔައެވެ. މީގެ ބަދަލުގައި ސަރަޙައްދުގައި ހުރި އެމެރިކާގެ ސަރަޙައްދީ ފެސިލިޓީސްތަކަށް އަމާޒުކޮށް މިސައިލާއި ޑްރޯން ބޭނުންކޮށްގެން އީރާނުން ޙަމަލާދީފައިވެއެވެ.
ޖޫން 17 ވަނަ ދުވަހު ސޮއިކުރި މި އެއްބަސްވުމުގެ މަޤުޞަދަކީ ދެ ޤައުމުގެ ދެމެދުގައި ހިނގަމުންދާ ހަނގުރާމައިގެ ހަރަކާތްތައް ކުޑަކޮށް ހޮރްމޯޒް ކަނޑުއޮޅިން ދަތުރުކުރެވޭގޮތް ހެދުމެވެ.
Advertisement
This content is created and paid for by advertisers and does not involve Voice Journalists
