އިސްތިއުމާރީ އިސްރާއީލުން ހިފާފައިވާ ހުޅަނގު އައްސޭރީގައި ޣައިރު ޤާނޫނީ ވަޒަންވެރިވުންތައް ފުޅާކުރުމުގެ ގޮތުން 8.5 ބިލިއަން ޝެކެލް (2.3 ބިލިއަން ޑޮލަރު) ގެ ފްރޭމްވޯކް އެއްބަސްވުމެއްގައި ސޮއިކޮށްފައިވާ ކަމަށް އިސްރާއީލުގެ މީޑިއާ ބުނެފައިވެއެވެ.
މި އެއްބަސްވުމުގެ ދަށުން 12000 އައު ބޯހިޔާވަހިކަމުގެ ޔުނިޓް އިމާރާތްކުރުމާއި ބޮޑެތި އުމްރާނީ ތަރައްޤީގެ މަޝްރޫޢުތައް ހިންގުމަށް ހަމަޖެހިފައިވެއެވެ.
އިސްރާއީލުގެ ޗެނަލް 14 އިން މި އެއްބަސްވުމަކީ ޣައިރު ޤާނޫނީ ސެޓްލްމަންޓްތައް ފުޅާކުރުމަށާއި "ސަރަޙައްދުގެ ސިފަ ބަދަލުކުރުމަށް" ބާރުއެޅުމަށް އެޅި "ބިޔަ" ފިޔަވަޅެއް ކަމަށް ސިފަކޮށްފައިވެއެވެ.
މި އެއްބަސްވުމުގައި ސޮއިކޮށްފައި ވަނީ ރަސްމީ ރަސްމިއްޔާތެއްގައި ކަމަށާއި މި ރަސްމިއްޔާތުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ފިނޭންސް މިނިސްޓަރު ބެޒަލެލް ސްމޮޓްރިޗް އިސްރާއީލު ލޭންޑް އޮތޯރިޓީގެ ޑިރެކްޓަރ ޖެނެރަލް ޔަހޫދާ އީލިޔާހޫ އަދި ހުޅަނގު އައްސޭރީގެ އުތުރުގައިވާ ގިނަ ޢަދަދެއްގެ އިސްރާއީލު ސެޓްލްމަންޓްތައް ބަލަހައްޓާ ޝޮމްރޮން ރީޖަނަލް ކައުންސިލްގެ ވެރިޔާ ޔޮސީ ޑަގަން ބައިވެރިވެފައިވެއެވެ.
މި ރިޕޯޓުގައި ބުނެފައިވަނީ މި އެއްބަސްވުމުގެ ސަބަބުން ސަރަޙައްދުގައި ޣައިރު ޤާނޫނީ ސެޓްލްމަންޓްތައް ފުޅާކުރުމުގެ ޕްރޮސެސްއަށާއި އެތަންތަނުގެ އުމްރާނީ ވަސީލަތްތައް ޒަމާނީ ފެންވަރަށް ބަދަލުކުރުމަށް "ބޮޑު ކުރިއެރުމެއް" ލިބިގެންދާނެ ކަމަށެވެ.
އިސްރާއީލުގެ ސެޓްލްމަންޓާ ދެކޮޅު ފާރަވެރި ޖަމާޢަތެއް ކަމަށްވާ ޕީސް ނައު އިން ބުނާ ގޮތުގައި ހިފާފައިވާ ހުޅަނގު އައްސޭރީގެ ސެޓްލްމަންޓްތަކުގައި ގާތްގަނޑަކަށް 500000 އިސްރާއީލު ޣައިރު ޤާނޫނީ ސެޓްލަރުން ދިރިއުޅެއެވެ. މީގެ އިތުރުން ހިފާފައިވާ އިރުމަތީ ގުދުސްގެ ސެޓްލްމަންޓްތަކުގައި ގާތްގަނޑަކަށް 250000 މީހުން ދިރިއުޅެއެވެ.
އދ. އިން ތަކުރާރުކޮށް ބުނަމުންދަނީ ފަލަސްޠީނުގެ ހިފާފައިވާ ބިންތަކުގައި ހަދާފައިވާ އިސްރާއީލުގެ ސެޓްލްމަންޓްތަކަކީ ބައިނަލްއަޤުވާމީ ޤާނޫނުގެ ދަށުން ޣައިރު ޤާނޫނީ ކަންކަން ކަމަށެވެ.
Advertisement
This content is created and paid for by advertisers and does not involve Voice Journalists
