ރާއްޖޭގެ އެކި ސަރަހައްދުތަކުގައި ގަވާއިދާ ހިލާފަށް އުޅެމުންދިޔަ 12 ހާހަށްވުރެ ގިނަ ބިދޭސީން ޤައުމަށް ފޮނުވާލާފައިވާކަމަށް ދާހިލީ ވުޒާރާއިން ބުނެފިއެވެ.
ހޯމް މިނިސްޓްރީން ބުނީ ގަވާއިދާ ހިލާފަށް އުޅެމުންދާ ބިދޭސީން ފޮނުވާލުމަށް ސަރުކާރުގެ ކަމާބެހޭ އިދާރާތަކުން ކުރަމުންގެންދާ މަސައްކަތްތަކުގެ ދަށުން މިހާތަނަށް ރެކޯޑް އަދަދަކަށް ބިދޭސީން ފޮނުވާލެވިފައިވާކަމަށެވެ. އެގޮތުން 2023 ވަނަ އަހަރުގެ ނޮވެމްބަރުމަހުގެ 17 ވަނަ ދުވަހުން ފެށިގެން މިއަހަރުގެ ޖޫންމަހުގެ 13 ވަނަ ދުވަހުގެ ނިޔަލަށް ކުރެވުނު މަސައްކަތްތަކުން 12،552 ބިދޭސީން އެމީހުންގެ ގައުމަށް އަނބުރާ ފޮނުވާލެވިފައިވާކަމަށް މިނިސްޓްރީން ފާހަގަކުރިއެވެ.
ދާހިލީ ވުޒާރާއިން ބުނީ ފޮނުވާލި މީހުންގެ ތެރޭގައި ޑީޕޯޓްކޮށްފައިވާ ފަރާތްތަކާއި، އެނޫންވެސް ގޮތްގޮތަށް ފޮނުވާލާފައިވާ ފަރާތްތައް ހިމެނެއެވެ. ޑީޕޯޓްކުރި ބިދޭސީންގެ ތެރޭގައި ރާއްޖޭގައި ޤަވާއިދާއި ޚިލާފަށް ވިޔަފާރިކުރާ މީހުންނާއި، ޑޮކިއުމަންޓުތައް ފުރިހަމަ ނޫން މީހުން ގިނަ އަދަދަކަށް ހިމެނޭކަމަށް ބުންޏެވެ.
ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ފުލުހުންނާއި މޯލްޑިވްސް އިމިޤްރޭޝަނާއި އަދި ސަރުކާރުގެ ކަމާބެހޭ އިދާރާތޔައް ގުޅިގެން ކާމިޔާބު މަސައްކަތްތަކެއް ކުރެވެމުންދާކަމަށް ދާހިލީ ވުޒާރާއިން ވަނީ ފާހަގަކޮށްފައެވެ.
ނުގަވައިދުން އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްދާއޮޕަރޭޝަން ކުރަނގީގެ ދަށުން މިހާތަނަށް ދެ ލައްކަ ދެ ހާހަށްވުރެ ގިނަ ބިދޭސީންގެ މަޢުލޫމާތު ވަނީ އެއްކޮށްފައެވެ. އަދި އަންނަ އަހަރުން ފެށިގެން އެއްވެސް ގޮތަކަށް ޤަވާއިދާ ޚިލާފަށް އުޅޭ ބިދޭސީއަކު ފެނިއްޖެނަމަ އިތުރު ފުރުސަތަކާ ނުލާ ޑީޕޯޓު ކުރާނެ ކަމަށް ސަރުކާރުން ވަނީ ބުނެފައެވެ.
ދާހިލީ ވުޒާރާއިން ބުނީ މި މަސައްކަތް ކުރިއަށް އޮތް 6 މަސް ދުވަހު ކުރިއަށްދާނޭކަމަށެވެ.
Advertisement
This content is created and paid for by advertisers and does not involve Voice Journalists
