ހިންމަފުށީގައި މިދިޔަ އާދިއްތަ ދުވަހުގެ ރޭ ދިވެހި ބަޔަކާއި ބިދޭސީ ބަޔަކާ ދެމެދު ހިނގި މާރާމާރީއަކާ ގުޅިގެން އެކަމުގައި ހިއްސާވި ބިދޭސީ ދެ މީހުން އަނބުރާ ރާއްޖެ ނާދެވޭގޮތަށް ހެދުމަށް ނިންމާފައިވާކަމަށް ފުލުހުން ބުނެފިއެވެ.
މި މައްސަލައާ ގުޅިގެން ފުލުހުން މިއަދު ބުނެފައިވަނީ، ހިންމަފުށީގައި ބަޔަކު މާރާމާރީ ހިންގި މައްސަލައެއް މިދިޔަ އާދިއްތަދުވަހުގެ ރޭ 19:24 ހާއިރު ފުލުހުންނަށް ރިޕޯޓްކޮށްފައިވާކަމަށެވެ. ފުލުހުން ބުނީ މި މައްސަލައިގެ ތުހުމަތުގައި މިސްރަށް ނިސްބަތްވާ ބިދޭސީ 2 ފިރިހެނަކު ފުލުހުންގެ ބެލުމުގެ ދަށަށް ގެނެސް ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 2 ދުވަހަށް ބަންދު ކުރުމަށް އަމުރުކޮށްފައިވާކަމަށެވެ. އަދި މިކަމާ ގުޅިގެން ފުލުހުން ބަލަންޖެހޭ ކަންކަން ބަލައި ނިންމާފައިވާކަން ފުލުހުން ބުންޏެވެ.
ތަހުގީގުގެ ހޯދުނު ކަންކަމުގެ މައްޗަށް ރިއާޔަތްކޮށް، ތުހުމަތު ކުރެވޭ މީހުން ރާއްޖެއިން ފުރުވާލާފައިވާކަމަށް ފުލުހުން ވަނީ ބުނެފައެވެ. އަދި އެމީހުން އަނބުރާ ރާއްޖެ ނާދެވޭނެ ގޮތް ހެދުމަށް މޯލްޑިވްސް އިމިގްރޭޝަނަށް ހުށަހަޅާފައިވާކަމަށްވެސް ފުލުހުން ބުންޏެވެ.
މި މާރާމާރީ ހިނގާފައިވަނީ ކޮން ސަބަބަކާ ލައިގެންކަމެއް ފުލުހުން ބުނެފައެއް ނުވެއެވެ. އަދި އެމީހުން އަނބުރާ ފޮނުވާލަންޖެހޭކަމަށް ފުލުހުންނަށް ފާހަގަވި އެއްވެސް ކަމެއްގެ ވާހަކަ ފުލުހުން ހިއްސާކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
