އެމެރިކާއާއި ސައޫދީ ޢަރަބިއްޔާއާ ދެމެދު މަދަނީ ނިއުކްލިއާ ޕްރޮގްރާމެއް ތަރައްޤީކުރުމަށް މަގުފަހިކޮށްދޭ "ނިއުކްލިއާ އެއްބާރުލުމުގެ އެއްބަސްވުމެއް" ގައި ރަސްމީކޮށް ސޮއިކޮށްފިއެވެ.

މި އެއްބަސްވުމުގައި ސޮއިކުރެއްވީ އެމެރިކާގެ ހަކަތައާ ބެހޭ ވަޒީރު ކްރިސް ރައިޓާއި ސައޫދީ ޢަރަބިއްޔާގެ ހަކަތައާ ބެހޭ ވަޒީރު ޕްރިންސް ޢަބްދުލްޢަޒީޒް ބިން ސަލްމާނެވެ. މިދިޔަ ނޮވެމްބަރު މަހު ސައޫދީ ލީޑަރު ވޮޝިންގްޓަނަށް ކުރެއްވި ދަތުރުފުޅަށް ފަހު އެކުލަވައިލި މި އެއްބަސްވުމަކީ ހަކަތައާ ބެހޭ ދާއިރާއިން ދެ ޤައުމުގެ ގުޅުން އިތުރަށް ފުޅާކުރުމަށް އެޅުނު މުހިންމު ފިޔަވަޅެއް ކަމަށް ދެ ޤައުމުން ވެސް ފާހަގަކުރެއެވެ.

އެމެރިކާގެ ހަކަތައާ ބެހޭ ވުޒާރާއިން ހާމަކުރި ގޮތުގައި، މި އެއްބަސްވުމުގެ ސަބަބުން ސައޫދީގެ ނިއުކްލިއާ ހަކަތައިގެ މަޝްރޫޢުތަކުގައި ބައިވެރިވުމުގެ ބޮޑު ފުރުޞަތެއް އެމެރިކާގެ ކުންފުނިތަކަށް ލިބިގެންދާނެއެވެ. މީގެ އިތުރުން ނިއުކްލިއާ ހަތިޔާރު ނުފެތުރުމުގެ އުސޫލުތައް ހިމެނޭ ގޮތަށް، އެތައް ބިލިއަން ޑޮލަރެއްގެ އަގުހުރި "ދެ ފަރާތެއްގެ ސޭފްގާޑް އެއްބަސްވުމެއް" ގައި ވެސް ވަނީ ސޮއިކޮށްފައެވެ.

މި އެއްބަސްވުމުގެ ދަށުން ސައޫދީ ޢަރަބިއްޔާއަށް ކުރިމަގުގައި ޔޫރޭނިއަމް ފައްކާކުރުމުގެ ހުއްދަ ލިބިދާނެ ކަމަށް އެމެރިކާގެ ނޫސްތަކުން ރިޕޯޓުކޮށްފައިވެއެވެ. މިއީ އެމެރިކާއިން އެހެން ޤައުމެއްގެ ބިމުގައި ޔޫރޭނިއަމް ފައްކާކުރުމަށް އެހީތެރިވާ ފުރަތަމަ ފަހަރު ކަމަށްވާތީ، ބައެއް ތަޖުރިބާކާރުން ވަނީ މިކަމުގެ ސަބަބުން ނިއުކްލިއާ ހަތިޔާރު ފެތުރުމުގެ ނުރައްކާ އޮވެދާނެ ކަމަށް ބުނެ ކަންބޮޑުވުން ފާޅުކޮށްފައެވެ.

މި ކަންބޮޑުވުންތަކަށް ރައްދު ދެއްވަމުން އެމެރިކާގެ ހަކަތައާ ބެހޭ ވަޒީރު ކްރިސް ރައިޓް ވިދާޅުވީ، މި އެއްބަސްވުމުގެ ސަބަބުން ނިއުކްލިއާ ރައްކާތެރިކަމުގެ އެންމެ މަތީ މިންގަނޑުތައް ހިފެހެއްޓޭނެ ކަމަށެވެ. އަދި އެމެރިކާގެ ޚާރިޖީ ވަޒީރު މާކޯ ރޫބިއޯ ވެސް ވަނީ ނިއުކްލިއާ ހަތިޔާރު ފެތުރުމުގެ ނުރައްކާ އޮންނާނެ ފަދަ އެއްބަސްވުމެއް އެމެރިކާއިން ނުހަދާނެ ކަމުގެ ޔަޤީންކަން ދެއްވާފައެވެ.

ނަމަވެސް އެމެރިކާގެ ޑިމޮކްރެޓިކް ޕާޓީގެ ބައެއް މެންބަރުން މި އެއްބަސްވުމާ ދެކޮޅަށް ވާހަކަ ދައްކަވާފައިވެއެވެ. ސެނެޓަރު އެޑްވާޑް މާކީ ވިދާޅުވީ މިއީ އީރާނުގެ ނިއުކްލިއާ ބޮން ހުއްޓުވުމުގެ ނަމުގައި ހަނގުރާމައެއް ފަށާފައި، އަނެއްކޮޅުން ސައޫދީއަށް މިފަދަ ހުއްދައެއް ދިނުމަކީ ބަލައިގަނެވޭނެ ކަމެއް ނޫން ކަމަށެވެ.

މި އެއްބަސްވުމަކީ ރަޝިއާއާއި ޗައިނާއިން ސައޫދީއާ އެކު މިފަދަ ގުޅުމެއް ބޭއްވުމަށް މަސައްކަތް ކުރަމުންދާ ދަނޑިވަޅެއްގައި، އެމެރިކާގެ ނުފޫޒު ދެމެހެއްޓުމަށް ނިންމި ނިންމުމެއް ކަމަށް ބެލެވެއެވެ.

މި އެއްބަސްވުން ދެން ފޮނުވޭނީ އެމެރިކާގެ ކޮންގްރެސްގެ ރިވިއުއަށެވެ. ކޮންގްރެސްގެ ދެ ގޮފި މިހާރު ކޮންޓްރޯލް ކުރަނީ ރައީސް ޓްރަމްޕުގެ ރިޕަބްލިކަން ޕާޓީން ކަމަށްވާތީ، މި އެއްބަސްވުން ފާސްވާނެ ކަމަށް ބޮޑަށް ބެލެވެއެވެ.