އީރާނާ ދެކޮޅަށް އެމެރިކާ އާއި އިސްރާއީލުން ފަށާފައިވާ ހަނގުރާމައާ ގުޅިގެން މެދުއިރުމަތީގެ ހާލަތު ގޯސްވެ ބައިނަލްއަޤުވާމީ އަސްކަރީ މަނަވަރުތައް ރަތްކަނޑާއި މެދުއިރުމައްޗަށް ބަދަލުކުރަން ޖެހުމުން ސޯމާލިއާ ކައިރީގެ ކަނޑުގެ ސަރަޙައްދު ބެލެހެއްޓުން ދަށްވެ ހޯން އޮފް އެފްރިކާ ސަރަޙައްދުގައި ކަނޑުފޭރުމުގެ ޙަރަކާތްތައް އަނެއްކާވެސް ގިނަވެއްޖެއެވެ.

ކަނޑުފޭރޭ ފަރާތްތައް މިހާރު ޢަމަލުކުރަމުން ދަނީ 15 އަހަރު ކުރީގެ ނުރައްކާތެރި އުކުޅެއް ކަމުގައިވާ "މަދަރޝިޕް" ބޭނުންކޮށްގެން ކަނޑުފޭރުނު ގޮތަށެވެ. އެ އުކުޅުގައި ކުރީން ހައިޖެކްކޮށްފައިވާ ބޮޑެތި މުދާ އުފުލާ ބޯޓުތައް މަރުކަޒެއްގެ ގޮތުގައި ބޭނުންކޮށް ކުދި ލޯންޗުފަހަރުގައި ނުކުމެ އިންޑިއާ ކަނޑުން ދަތުރުކުރާ އެހެން އުޅަނދުތައް ފޭރެމުން ގެންދެއެވެ. މިގޮތުން މިދިޔަ ޖުލައި މަހުގެ 16 ވަނަ ދުވަހު މި އަހަރު ކުރީކޮޅު އަތުލައިގެންފައިވާ 330 ފޫޓުގެ ސިމެންތި ބޯޓެއްގައި ތިބި ކަނޑުފޭރޭ ބަޔަކު ވަނީ އީރާނުގެ ދެ މަސްބޯޓެއް ހިފަހައްޓައިފައެވެ.

ފާއިތުވި ހަފުތާގައި ޕަންޓްލޭންޑުގެ އައްސޭރިފަށުގައި ރަހީނުކޮށްގެން ގެންގުޅުނު ހަ އުޅަނދެއް ދޫކުރުމުގެ ބަދަލެއްގެ ގޮތުގައި ކަނޑުފޭރޭ މީހުން ބޮޑެތި ޢަދަދުތަކުން ފައިސާ ހޯދަން ދިޔައީ ބާރުއަޅަމުންނެވެ. އެ ހަ އުޅަނދުގެ ތެރެއިން ދެ އުޅަނދެއް ވަނީ މިދިޔަ ހޮނިހިރު ދުވަހު މިނިވަންކޮށްފައެވެ.

ކަނޑުފޭރުމުގެ މި ނުރައްކަލަކީ އިންޑިއާ ކަނޑުގެ ކަނޑުދަތުރުފަތުރަށް އޮތް ބޮޑު ގޮންޖެހުމެކެވެ. މީގެ ކުރީގެ ތަޖުރިބާއަށް ބަލާއިރު ރަހީނުން ސަލާމަތްކުރުމަށް ފިދުޔައިގެ ގޮތުގައި މިލިއަނުން ޕައުންޑް ހޭދަވެފައިވާ އިރު ބައިނަލްއަޤުވާމީ ވިޔަފާރިއަށް ބިލިއަނުން ގެއްލުން ވެފައިވެއެވެ.