އެމެރިކާގެ މަޝްހޫރު ކުންފުނި، ޖޯންސަން އެންޑް ޖޯންސަން (ޖޭ.އެންޑް.ޖޭ) އިން އުފައްދާ ބޭބީ ޕައުޑަރު ބޭނުންކޮށްގެން ކެންސަރު ޖެހިފައިވާ ކަމަށް ބުނެ އުފުލާފައިވާ އެތައް ހާސް ދައުވާތަކެއް ހައްލުކުރުމަށް 5.5 ބިލިއަން އެމެރިކާ ޑޮލަރު ދިނުމަށް އެ ކުންފުނިން ހުށަހަޅައިފިއެވެ.

ނިއު ޖާޒީއަށް ނިސްބަތްވާ މި ކުންފުނިން މި ހުށަހެޅުން ހުށަހަޅާފައިވަނީ، އެ ކުންފުނީގެ ޓެލްކަމް ޕައުޑަރު އެކުލެވޭ އުފެއްދުންތަކުގެ ސަބަބުން އޯވަރިއަން ކެންސަރު (ރަހިމުގެ ދަަރިމައި ހޮޅިއަށް ޖެހޭ ކެންސަރު) ޖެހޭ ކަމަށް ބުނެ ކުރަމުންދާ ގާނޫނީ ހަނގުރާމައަށް ނިމުމެއް ގެނައުމުގެ މަގުސަދުގައެވެ.

ޖޭ.އެންޑް.ޖޭ ގެ ލިޓިގޭޝަން ވައިސް ޕްރެޒިޑެންޓް އެރިކް ހާސް ހޯމަ ދުވަހު ވިދާޅުވީ، ކުންފުނީގެ އުފެއްދުންތަކާ ދެކޮޅަށް ކުރާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށެވެ. ނަމަވެސް، މި މައްސަލަ އެއްކޮށް ނިންމާލުމަށްޓަކައި ބަދަލު ދިނުމަށް ކުންފުނިން ތައްޔާރަށް އޮތް ކަމަށް އޭނާ ވިދާޅުވިއެވެ.

މި ހުށަހެޅުމުގެ ދަށުން އަންނަ އަހަރު 3 ބިލިއަން ޑޮލަރު ދިނުމަށް ވަނީ ނިންމާފައެވެ. އަދި ބާކީ ފައިސާ 2028 ވަނަ އަހަރުގެ ކުރިން ދައްކަން ނުޖެހޭނެ ކަމަށް ކުންފުނިން ބުނެއެވެ. މި އެއްބަސްވުން ފައިނަލް ވާނީ ކޯޓުތަކުގައި މައްސަލަ ޖައްސާފައިވާ ފަރާތްތަކުގެ 95 އިންސައްތަ ތަމްސީލުކުރާ ލޯ ފާމްތަކުން މި ހުށަހެޅުން ގަބޫލުކުރުމުންނެވެ.

ޖޭ.އެންޑް.ޖޭ އިން ތަކުރާރުކޮށް ބުނަމުންދަނީ އެ ކުންފުނީގެ ޓެލްކަމް ޕައުޑަރަކީ ރައްކާތެރި އެއްޗެއް ކަމަށާއި، އޭގައި އެސްބެސްޓޯސް ނުހިމެނޭނެ ކަމަށެވެ. ޓެލްކަކީ މެގްނީޒިއަމް، ސިލިކަން، އޮކްސިޖަން އަދި ހައިޑްރަޖަން އެކުލެވޭ ގުދުރަތީ މިނަރަލްއެކެވެ. ނަމަވެސް، ބައެއް ފަރާތްތަކުން ތުހުމަތު ކުރަނީ މި މާއްދާ ބިމުން ނަގާއިރު ކެންސަރު ޖައްސާ މާއްދާއެއް ކަމަށްވާ އެސްބެސްޓޯސްއާ މަސްހުނިވާ ކަމަށެވެ.

2009 ވަނަ އަހަރުން ފެށިގެން މި މައްސަލައިގައި ދައުވާތައް ކުރަމުންދާއިރު، ޖޭ.އެންޑް.ޖޭ އިން ވަނީ 2022 ވަނަ އަހަރު ދުނިޔޭގެ ބާޒާރުގައި ޓެލްކް ހިމެނޭ ބޭބީ ޕައުޑަރު ވިއްކުން ހުއްޓާލައި، އޭގެ ބަދަލުގައި ކޯންސްޓާޗް ބޭނުންކޮށްގެން ޕައުޑަރު އުފައްދަން ފަށާފައެވެ.

އެރިކް ހާސް އިތުރަށް ވިދާޅުވީ، މި މައްސަލަ ހައްލުވުމުން ބޭހާއި ސިއްހީ އާލާތްތައް އުފެއްދުމަށް ފުރިހަމައަށް ސަމާލުކަން ދެވޭނެ ކަމަށެވެ. ޖޭ.އެންޑް.ޖޭ އިން ވަކިވެފައިވާ 'ކެންވިއު' ކުންފުނިން މިހާރު އުތުރު އެމެރިކާ ފިޔަވައި އެހެން ސަރަހައްދުތަކުގައި ބޭބީ ޕައުޑަރުތައް ވިއްކަމުންދާކަން ފާހަގަކޮށްލެވެއެވެ.