ނިމިދިޔަ ސަރުކާރުގައި ފެނަކަ ކޯޕަރޭޝަނުން އައްޑޫ ސިޓީގައި ހިންގި މަޝްރޫއުތަކުގައި ކޮރަޕްޝަނާއި މަނީ ލޯންޑަރިންއަށް މަގުފަހިވާ ގޮތަށް ކަންކަން ހިނގާފައިވާތީ، އެ މައްސަލަތައް ފުލުހުން މެދުވެރިކޮށް ތަހުގީގު ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

މަޖިލީހުގެ މާލިއްޔަތު ކޮމިޓީން ފެނަކައިގެ އައްޑޫ ބްރާންޗުތަކާއި މަޝްރޫއުތަކާ ގުޅޭގޮތުން އެކުލަވާލި ޚާއްސަ އޮޑިޓް ރިޕޯޓް ދިރާސާކުރުމަށްފަހު ހުށަހެޅި ރިޕޯޓު މަޖިލީހުގެ މިއަދުގެ ޖަލްސާގައި ފާސްކޮށްފައިވަނީ ޖަލްސާގައި ބައިވެރިވެވަޑައިގެންނެވި 53 މެންބަރުންގެ އިއްތިފާގުންނެވެ.

އޮޑިޓް ރިޕޯޓުން ހާމަވެފައިވާ ގޮތުގައި، ކުންފުންޏަށް ބޮޑެތި ގެއްލުންވާ ގޮތަށް މަޝްރޫއުތައް ހިންގާފައިވާއިރު، ކަރަންޓާއި ފެން ބިލްތަކުން ކުންފުންޏަށް ލިބެންޖެހޭ 77 މިލިޔަން ރުފިޔާ ނުލިބިވާކަން ވަނީ ފާހަގަކުރެވިފައެވެ.

މީގެ އިތުރުން، އެންމެ ބޮޑު މައްސަލައެއްގެ ގޮތުގައި ފާހަގަވެފައިވަނީ ކުންފުނީގެ އެކައުންޓުން މުވައްޒަފުންގެ އަމިއްލަ އެކައުންޓުތަކަށް "ޕެޓީ ކޭޝް"ގެ ގޮތުގައި ފައިސާ ޖަމާކޮށްފައިވާ މައްސަލައެވެ. އެގޮތުން މުވައްޒަފުންނާއި އާއިލީ ގުޅުން ހުރި ވިޔަފާރިތަކުން 783,296 ރުފިޔާގެ ތަކެތި ގަނެފައިވާކަމާއި، ލިޔެކިޔުންތައް ފޯޖުކޮށްގެން 130,220 ރުފިޔާގެ ޕެޓީ ކޭޝް ނަގާފައިވާކަން ރިޕޯޓުން އެނގެއެވެ. އަދި ޕެޓީ ކޭޝްގެ ގޮތުގައި ހަރަދުކުރި 4.3 މިލިއަން ރުފިޔާގެ ތެރެއިން ސައިޓުތަކަށް ހަގީގަތުގައި ލިބުނު މުދަލާއި ޚިދުމަތުގެ އަދަދު ކަށަވަރު ނުކުރެވޭ ކަމަށްވެސް އޮޑިޓް ރިޕޯޓުގައި ބަޔާންކޮށްފައިވެއެވެ.

މި މައްސަލައިގައި ފުނަދޫ ދާއިރާގެ މެންބަރު މުޙައްމަދު މަމްދޫހު ހުށަހެޅުއްވީ ފެނަކައިގެ ފައިސާއަށް ހިޔާނަތްތެރިވި އޭރުގެ ބޯޑު މެންބަރުންނާއި މިކަމުގައި ޝާމިލުވާ ހުރިހާ ފަރާތްތަކުގެ މައްސަލަ ފުލުހުންނާއި އޭސީސީއަށް ހުށަހެޅުމަށެވެ. އަދި އާއިލީ ގުޅުން އޮންނަ ވިޔަފާރިތަކުން މުދާ ނުގަނެވޭ ގޮތަށް ކުންފުނީގެ ޕްރޮކިއުމަންޓް ޕޮލިސީ އިސްލާހުކުރުމަށްވެސް އޭނާ ބާރުއެޅުއްވިއެވެ.

ހިތަދޫ މެދު ދާއިރާގެ މެންބަރު އަހުމަދު އަޒާން މަރުޒޫގު ހުށަހެޅުއްވީ އައްޑޫ ބްރާންޗުތަކުގެ ވެރިންނާއި އެ ފަރާތްތަކުގެ އާއިލީ މީހުންގެ އެކައުންޓްތަކަށް ނުހައްގުން ފައިސާ ޖަމާވެފައިވޭތޯ ބެލުމަށް މަނީ ލޯންޑްރިންގެ ފުރިހަމަ ތަހުގީގެއް ހިންގުމަށެވެ. އަދި މި ތަހުގީގުތަކުގެ ކުރިއެރުން ކޮންމެ މަހަކު މަޖިލީހަށް ހިއްސާކުރުމަށާއި، ކޮރަޕްޝަންގެ މައްސަލަތައް އަވަސްކުރުމަށް ޕްރޮސެކިއުޓަރ ޖެނެރަލް މެދުވެރިކޮށް އޭސީސީއަށް އެންގުމަށްވެސް މަޖިލީހުން ވަނީ ނިންމާފައެވެ.