މިނިވަންދުވަހުގެ މުނާސަބަތާ ގުޅިގެން ދިވެހި އަސްކަރިއްޔާއިން ބައްވާ ހިނގާލުން ހުޅުމާލޭގައި މާދަމާ ކުރިއަށްގެންދިއުމަށް ނިންމައިފިއެވެ.
މިކަމާ ގުޅޭގޮތުން އެމްއެންޑީއެފުން ބުނީ ހުޅުމާލޭގައި މާދަމާ ހިނގާލުން ބޭއްވުމަށް ހަމަޖެހިފައިވަނީ، 16:30 ގައެވެ. މި ހިނގާލުމުގައި އެމްއެންޑީއެފް ބޭންޑާ އެކު ޖުމްލަ ހަ ގެމަ ބައިވެރިވާނޭކަމަށް އެމްއެންޑީއެފުން ބުންޏެވެ. އަސްކަރީ ހިނގާލުމުގައި އެމްއެންޑީއެފްގެ ކޯރތަކާއި ތަފާތު ދާއިރާތަކުގެ ޚިދުމަތްތައް ދައްކާލުމަށް ވަނީ ހަމަޖެހިފައެވެ.
އެމްއެންޑީއެފުން ބުނީ ހުޅުމާލޭގައި ކުރިއަށް ގެންދަން ހަމަޖެހިފައިވާ މަގުމަތީ ހިނގާލުން ފަށާނީ، ހިތިގަސްމަގުގައި ހުންނަ ސިންތެޓިކް ދުވާ ޓްރެކް ކައިރީންނެވެ. އަދި ދެ ސަރަހައްދަކަށް ހުއްޓި މިލިޓަރީ ބޭންޑުން ރާގު ކުޅޭ ގޮތަށް ހަމަޖެހިފައިވާ އިރު، އެ ސަރަހައްދުތަކަކީ ސެންޓްރަލް ޕާކް (ހިތިގަސްމަގު – ހުވަނދުމާހިނގުން ޖަންކްޝަން)އާއި ސިފްކޯ ފުލެޓް (ރީތިގަސްމަގު – އަސުރުމާހިނގުން ޖަންކްޝަން) ކައިރީގައި ކަމަށް އެމްއެންޑީއެފުން ބުންޏެވެ.
ކޮންމެ އަހަރެއްގެވެސް މިނިވަން ދުވަހުގެ މުނާސަބަތުގައި އެމްއެންޑީއެފްގެ ޕެރޭޑް މަގުމަތީ ކުރިއަށްދާއިރު، މިއީ ކުޑަކުދިންނާއި ބޮޑެތިމީޙުންވެސް ވަރަށް ގަޔާވާ ހަރަކާތެއްކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
