ބޮޑުތަކުރުފާނުމަގު އަލަށް ތަރައްޤީކުރި ސަރަހައްދުގައި ފެންބޮޑުވަނީ، އެ ސަރަހައްދުގައި ގާއިމްކުރުމަށް ނިންމާފައިވާ ޕަމްޕް ސްޓޭޝަންތަކުގެ މަސައްކަތް އަދި ނުނިމޭތީކަމަށް އެމްޓީސީސީން ބުނެފިއެވެ.
މާލެއަށް މިހާރު ކުރަމުންދާ މޫސުމީ ވިއްސާރާގައި ބޮޑުތަކުރުފާނުމަގު އަލަށް ހެދި ސަރަހައްދުން ފެންބޮޑުވުވެ ބައެއް ފަރާތްތަކުން ފަތުރަމުންގެންދާ ވާހަކަތަކަށް އެމަގުގެ މަސައްކަތް ކުރަމުންގެންދާ އެމްޓީސީސީން މިއަދު ވަނީ މަގުގައި ފެންބޮޑުވާ ސަބަބު ސާފުކޮށްދީފައެވެ.
އެމްޓީސީސީން ބުނީ ބޮޑުތަކުރުފާނުމަގު އަލަށް ހެދި ސަރަހައްދު އާއްމު ދަތުރުފަތުރަށް ހުޅުވާލިއިރު، އެމަގު ފުރިހަމަ ކުރުމަށް ކުރަންޖެހޭ މަސައްކަތްތައް ކުރިއަށްދާކަމަށް ކުރިންވެސް އާއްމުކޮށް އިއުލާނުކޮށްފައިވާަކަމަށެވެ. އެގޮތުން އެމަގުގައި ބެހެއްޓުމަށް ހަމަޖެހިފައިވާ ތިން ޕަމްޕް ސްޓޭޝަން ބެހެއްޓުމުގެ މަސައްކަތް އަދި ނުނިމޭއިރު، މިހާރު މަސައްކަތް ކުރިއަށްދާގޮތުން އަންނަ އޮގަސްޓްމަހުގެ 15 ވަނަ ދުވަހުގެ ކުރިން އެ ޕަމްޕް ސްޓޭޝަންތައް ބޭނުންކުރަން ފަށާނޭކަމަށް އެމްޓީސީސީން ބުންޏެވެ.
އެމްޓީސީސީން ބުނީ މިހާރު ކުރަމުންދާ މޫސުމީ ވިއްސާރާގައި އެމަގުގައި ފެންބޮޑުވެއްޖެނަމަ ފެންގަނޑު ހިއްކުމުގެ މަސައްކަތް އެކުންފުނިން ކުރަމުންދާނޭކަމަށެވެ.
ފެންބޮޑުވާ މައްސަލާގައި މިއަދު ހައުސިން މިނިސްޓްރީން ބުނެފައިވަނީ، ބޮޑުތަކުރުފާނުމަގު އަލަށް ތަރައްޤީކުރި ސަރަހައްދު ޑިޒައިން ކޮށްފައިވަނީ ސްޓޯމްވޯޓަރ ދްރެއިނޭޖް ސިސްޓަމް ހިމެނޭ ގޮތަށްކަމަށެވެ. މަގުގެ ކެރިއޭޖްވޭގެ މަސައްކަތް ނިމުމާއެކު އާންމުނަށް ހުޅުވާލީ މަގު ބަންދުކޮށްފައި އޮތުމުން އާންމުނަށް ފަސޭހަކުރުމުގެ ގޮތުންކަމަށެވެ.
Advertisement
This content is created and paid for by advertisers and does not involve Voice Journalists
