ފ.ނިލަންދޫއިން ފުރައިގެން ދ މީދޫއަށް ދަތުރުކުރި ކަނޑުގަދަވެ ލޯންޗެއް ހާލުގައި ޖެހިއްޖެއެވެ.
ފުލުހުން ބުނީ ނިލަންދޫއިން މީދުއަށް ފުރި ލޯންޗު ހާލުގައި ޖެހުމުގެ ހާދިސާ ރިޕޯޓްކޮށްފައިވަނީ މިއަދުގެ 15:50 ހާއިރުކަމަށެވެ. ލޯންޗު ކަނޑުގަދަވެ ހާލުގައި ޖެހުމާ ގުޅިގެން، ފުލުހުން އެހިސާބަށް ދަތުރުކޮށް ނިލަންދޫގައި ތިބި ފުލުހުން ވަނީ ލޯންޗު ރައްކާތެރިކަމާއެކު ނިލަންދޫއަށް ގެންގޮސްދީފައެވެ.
ފުލުހުން އެ ލޯންޗު ހޯދާފައިވަނީ ދ. ފުށިކަނޑު ސަރަހައްދުންނެވެ. ފުލުހުން ބުނީ އޭގައި ތިބި 15 މީހުންނާއެކު ރައްކާތެރިކަމާއެކު ނިލަންދޫއަށް ގެންދިޔައިރު، ލޯންޗުގައި ތިބި، އަންހެނުންނާއި ކުޑަކުދިން ހިމެނޭހެން 12 ފަސިންޖަރުންނާއި 3 ފަޅުވެރިންގެ ތެރެއިން އެއްވެސް މީހަކަށް މި ހާދިސާގައި އަނިޔާއެއް ލިބިފައި ނުވާކަމަށެވެ. މި ހާދިސާ ހިނގަން މެދުވެރިވީ ކަނޑުގަދަވުމުގެ ސަބަބުން ލޯންޗަށް ރާޅު އެރުމާ ގުޅިގެންނެވެ.
ފުލުހުން ވަނީ ކަނޑުދަތުރުފަތުރު ކުރައްވާ ފަރާތްތަކުން ދަތުރަށް ފެށުމުގެ ކުރިން މޫސުމާ ބެހޭ ފަހުގެ މައުލޫމާތު ހޯދުމަށް އެދިފައެވެ. އަދި އުޅަނދުފަހަރުގައި ފުރިހަމަވާންޖެހޭ ސަލާމަތީ ވަސީލަތްތައް ހަމައަށް ހުރިތޯ ބަލައި ޗެކްކުރުމަށްވެސް ވަނީ އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
