ހުޅުމާލެއަށް ދިމާވެފައިވާ ކުނީގެ މައްސަލަ ހައްލުކުރުމަށް އެޗްޑީސީން ވެމްކޯއަށް ވަގުތީގޮތުން ހުޅުމާލެއިން ބިމެއް ހަމަޖައްސައިދީފިއެވެ.
މިކަން ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލު ވަނީ އެކްސްގައި ކުރެއްވި ޕޯސްޓެއްގައި ޔަގީންކޮށްދީފައެވެ. މި ޕޯސްޓްގައި މުޖުތަބާ ވިދާޅުވީ، ކުނީގެ މައްސަލަ ހައްލުކުރުމަށް އެޗްޑީސީން އެކަށީގެންވާ ބިމެއް ވެމްކޯއަށް މިއަދު ހަމަޖައްސައިދީފައިވާކަމަށެވެ.
މިއީ އެޗްޑީސީގެ މެނޭޖިން ޑިރެކްޓަރުގެ އިސްނެންގެވުމުގެ ދަށުން ކުރެވިގެންދިޔަ ކަމެއްކަންވެސް މުޖުތަބާ ވިދާޅުވިއެވެ. އަދި މިކަމުން ވަރަށް ރަނގަޅު ހައްލެއް ލިބިގެންދާނެކަންވެސް ވަނީ ފާހަގަކުރައްވާފައެވެ.
ތިލަފުށީ ވެމްކޯ ކުނި އެއްކުރާ ސައިޓްގައި ހިނގާދިޔަ އަލިފާނުގެ ހާދިސާގެ ސަބަބުން އެތަނަށް ކުނި ގެންދިއުމުގައި ކޮންމެވެސް ވަރެއްހެ ހިފެހެއްޓުންތަކެއް މިހާރު ގެންގުޅެމުން އަންނަކަމަށް ވެމްކޯއިން ވަނީ ބުނެފައެވެ. އެގޮތަށް ކަންތައް ކުރަންޖެހުނީ އަލިފާނުގެ ސަބަބުން ބައެއް ސަރަހައްދުތައް ވަގުތީގޮތުން ބަންދުކުރަން ޖެހުމުންނެވެ.
އަލިފާނުގެ ހާދިސާގައި ކުނި ގެންދާ ބައެއް ސައިޓްތައް ބަންދުކުރަން ޖެހުމުން ވިލިމާލެ، ހުޅުމާލެ އަދި މާލެއިން ކުނިގެންދިއުމަށް މީގެ ކުރިން ކުރަމުންއައި ދަތުރުތައް މަދުކުރަން މަޖުބޫރުވިއިރު، ވެމްކޯއިން ދަނީ ކުރީގެ ހާލަތައް އޮޕަރޭޝަން ގެނައުމަށް މަސައްކަތްކުރަމުންނެވެ.
ތިލަފުށި ވެމްކޯ ސައިޓްގައި ރޯވެފައި
ތިލަފުށީގައި ހުންނަ ވެމްކޯގެ ސައިޓުގައި އަލިފާނުގެ ހާދިސާ ހިނގާފައިވަނީ މިމަހުގެ 19 ވަނަ ދުވަހުގެ ރޭ އިރާކޮޅުގެ ވަގުތެއްގައެވެ. ވެމްކޯގެ ކުނި މެނޭޖުކުރާ ސައިޓުގައި ހިނގި އަލިފާނުގެ ހާދިސާގައި 50އެއްހާ ޓަނުގެ ކުނި އަނދާފައިވާކަމަށް ވެމްކޯއިން ވަނީ ބުނެފައެވެ. އެ ކުނިތައް އދ.ކުނބުރުދޫގައި ހިންގާ ވޭސްޓް މެނޭޖުމަންޓް ފެސިލިޓީއަށް ގެންދިއުމުގެ މަސައްކަތް ވަނީ ފަށާފައެވެ.
Advertisement
This content is created and paid for by advertisers and does not involve Voice Journalists
