ކަޕްވިނާސްކަޕްގައި ރޭ މާޒިޔާ ސްޕޯޓްސް ކްލަބާއި އޮޑި ސްޕޯޓްސް ކްލަބް ބައްދަލުކުރިމެޗް ހަނިގޮތަކަށް މާޒިޔާއިން ކާމިޔާބުކޮށްފިއެވެ.

މިމެޗް އޮޑީގެ މައްޗަށް މާޒިޔާ ކުރި ހޯދީ 2-1 ގެ ނަތީޖާއިންނެވެ. މިމެޗަށް މާޒިޔާ ނިކުތީ އެންމެފަހުން ކުޅުނު ޗެރިޓީ ޝީލްޑް މެޗްގައި ވަރުގަދަ ނިއުރޭޑިއަންޓް ބަލިކޮށް އެ އިތުބާރާއެކުގައެވެ. 

މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް މާޒިޔާ އެވެ. އެއީ މެޗްގެ 18 ވަނަ މިނެޓް ތެރޭގައި އައިހަމް ތަނަވަސްކޮށްދިން ފުރުސަތެއްގައި ނައްސާހް ކާމިޔާބުކޮށްދިން ލަނޑުންނެވެ. މާޒިޔާއިން ލަނޑެއް ޖަހައި ލީޑް ނަގާފައިވަނިކޮށް އޭގެ 11 މިނެޓްފަހުން އޮޑިން ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކޮށްދިނީ މުޒްދާނެވެ.

މެޗެގެ ފުރަތަމަ ހާފްގެ ކުޅުން 1-1 ގެ ނަތީޖާއިން ނިމުނުއިރު، ދެވަނަ ހާފްގައި މާޒިޔާ މޮޅުކޮށްދިން ލަނޑު ޖަހައިދިނީ އައިހަމް އެވެ. 

ކަޕްވިނާސް ކަޕްގައި މާޒިޔާ ދެން އެންމެ އަވަހަށް ނިކުންނާނީ އަންނަ ބްރާސްފަތި ދުވަހު ބުރު ސްޕޯޓްސް އާ ދެކޮޅަށެވެ. އޮޑި ނިކުންނާނީ ނިއުރޭޑިއަންޓާ ދެކޮޅަށެވެ.