ފަލަސްތީނުގެ ފުޓްބޯޅަ އެސޯސިއޭޝަނުން (ޕީ.އެފް.އޭ) ދުނިޔޭގެ ފުޓްބޯޅައިގެ މައި އިދާރާ، ފީފާއަށް ވަރުގަދަ ފާޑުކިޔުންތަކެއް އަމާޒުކޮށްފިއެވެ.

ޕީ.އެފް.އޭ އިން ބުނި ގޮތުގައި އިޒްރޭލުން ފަލަސްތީނުގެ ފުޓްބޯޅައަށް ބޮޑެތި ގެއްލުންތަކެއް ދެމުންދާއިރު، ފީފާގެ އަމިއްލަ ގަވާއިދުތައް އިޒްރޭލާ ދެކޮޅަށް ތަންފީޒުކުރުމުގައި އެ އިދާރާ ވަނީ ނުކުޅެދިފައެވެ.

މިދިޔަ ހޯމަ ދުވަހު ޕީ.އެފް.އޭ އިން ނެރުނު ބަޔާނެއްގައި ބުނެފައިވަނީ، ގާޒާގައި އިޒްރޭލުން ހިންގަމުންދާ ގަތުލުއާންމުގައި މިހާތަނަށް ފަލަސްތީނުގެ 1,013 އަށްވުރެ ގިނަ ކުޅުންތެރިންނާއި، ކޯޗުންނާއި، ރެފްރީންނާއި އަދި ފުޓްބޯޅައިގެ އެކި ދާއިރާތަކުގެ އޮފިޝަލުން ޝަހީދުކޮށްލާފައިވާ ކަމަށެވެ. މީގެ އިތުރުން ފަލަސްތީނުގެ ގިނަ އަދަދެއްގެ ސްޓޭޑިއަމްތަކާއި، ތަމްރީނުދޭ މަރުކަޒުތަކާއި ފުޓްބޯޅައިގެ އިންފްރާސްޓްރަކްޗަރު އިޒްރޭލުން ސުންނާފަތިކޮށްލާފައިވާ ކަމަށްވެސް އެ ބަޔާނުގައިވެއެވެ.

ޕީ.އެފް.އޭ އިން އިތުރަށް ފާހަގަކުރި ގޮތުގައި، އިޒްރޭލުން ފަލަސްތީނުގެ ބިންތަކަށް ވެރިވެގަނެގެން ހިންގާ ކްލަބްތަކާ ދެކޮޅަށް ފިޔަވަޅު އެޅުމަށް އެދި ހުށަހަޅަމުންދާތާ 15 އަހަރަށްވުރެ ގިނަ ދުވަސް ވެފައިވީނަމަވެސް، ފީފާއިން އެކަމަށް އެދެވޭ ހައްލެއް ހޯދައިދީފައެއް ނުވެއެވެ.

"ލޯ ކުރިމަތީގައި ގަތުލުއާންމެއް ހިންގަމުންދާއިރު ހަނު ހުރުމަކީ އެކަމުގައި ބައިވެރިވުން ފަދަ ކަމެއް،" ޕީ.އެފް.އޭ ގެ ބަޔާނުގައިވެއެވެ.

މިދިޔަ އަހަރު ފީފާއިން ބުނެފައިވަނީ "ޖިއޯޕޮލިޓިކަލް މައްސަލަތައް ހައްލުކުރުމަކީ ފީފާގެ މަސައްކަތެއް ނޫން" ކަމަށް ބުނެ އިޒްރޭލު ސަސްޕެންޑް ކުރުމަށް އިންކާރުކޮށްފައެވެ. ނަމަވެސް، ޔޫކްރޭން ހަނގުރާމައާ ގުޅިގެން ރަޝިއާ ވަގުތުން ސަސްޕެންޑްކުރި ފީފާއިން އިޒްރޭލާމެދު ގެންގުޅޭ މި ދެފުށްގެންގުޅޭ ސިޔާސަތަށް ދުނިޔޭގެ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.

މި މައްސަލަތަކާ ގުޅިގެން ފީފާގެ ރައީސް ޖިއާނީ އިންފަންޓީނޯއަށް އޮތް ޕްރެޝަރު ވަނީ ބޮޑުވެފައެވެ. އިނގިރޭސި ފުޓްބޯޅަ އެސޯސިއޭޝަނުން (އެފް.އޭ) ވަނީ އިންފަންޓީނޯ އަންނަ އަހަރު އިންތިޚާބުގައި ވާދަކުރައްވާއިރު އޭނާއަށް ދެމުންދާ ތާއީދު އަނބުރާ ގެންދަން ނިންމާފައެވެ. މީގެ އިތުރުން ވޭލްސް އަދި ސާބިއާގެ ފުޓްބޯޅަ އެސޯސިއޭޝަންތަކުންވެސް ވަނީ އިންފަންޓީނޯއަށް އޮތް ތާއީދު އަނބުރާ ގެންގޮސްފައިވާކަން ރަސްމީކޮށް އިއުލާންކޮށްފައެވެ.

ފީފާގެ ރައީސްކަމަށް ވާދަކުރަން ބޭނުންވާ ފަރާތްތަކުން ނޮވެމްބަރު 18 ގެ ކުރިން ނަން ހުށަހަޅަންޖެހޭއިރު، ކޮންކާކަފްގެ ރައީސް އަދި ފީފާގެ ނައިބު ރައީސް ވިކްޓަރ މޮންޓަގްލިއާނީ މި މަގާމަށް ކުރިމަތިލައްވާނެ ކަމަށް ބެލެވެއެވެ. އިންފަންޓީނޯ ފީފާގެ ރައީސްކަމާ ހަވާލުވެވަޑައިގަތީ 2016 ވަނަ އަހަރުއެވެ.