ބ.ކެންދޫ ދާއިރާގެ ރައްޔިތުންގެ މަޖިލީހުގެ މެމްބަރު މައުރޫފް ޒާކިރު މިއަދުގެ މަޖިލީހުގައި ރަނގަޅަށް މައުލޫމާތު ނުހޯއްދަވައި ވަޒީރާ ސުވާލުކުރައްވައިފިއެވެ.

ރައްޔިތުންގެ މަޖިލީހަށް މިއަދު އިސްލާމިކް މިނިސްތަރު ޑރ.މުހައްމަދު ޝަހީމް އަލީ ސައީދު ހާޒިރުކޮށް މިއަދު ވަނީ ސުވާލުކޮށްފައެވެ. މެމްބަރުންގެ ސުވާތަކަށް ބަލާއިރު، ގިަނ މެމްބަރުން ވަނީ އެ މެމްބަރުން ނިސްބަތްވާ ދާއިރާގެ މިސްކިތްތަކާއި އަދި އެނޫންވެސް މިނިސްޓްރީއާ ގުލޭ ކަންކަމުގައި މިނިސްޓަރު ޝަހީމް އާ ސުވާލުކުރައްވާފައެވެ. އަދި މިނިސްޓަރު ވަނީ މެމްބަރުންގެ ސުވާލުތަކަށް ޖަވާބުދެއްވާފައެވެ.

ކެންދޫ ދާއިރާގެ މެމްބަރު މިނިސްޓަރާ ކުރެއްވި ސުވާލުތަކުގެ ތެރެއިން އެންމެ ފާހަގަކުރެވުނު އެއް ސުވާލަކީ ތުޅާދޫ މިސްކިތަކުން ގަބުރުފެނުމާއި ގުޅިގެން ކުރެއްވި ސުވާލެވެ. ތުޅާދޫ ތުޅާދޫ މަސްޖިދުއްރަހުމާނު މިސްކިތުގެ ފެންޑާއިންނާއި ހަރިންމަތެރެއިން ގަބުރު ފެނުމާ ގުޅިގެން މިދިޔަ އަހަރު އެ މިސްކިތް ވަގުތީގޮތުން ވަނީ ބަންދުކޮށްފައެވެ. ނަމަވެސް ޝައްކުކުރެވޭ ތަންތަން ބަލައި ގަބުރުތައް ހުރި ތަންތަނުން އެ ނަގައި ސާފްކުރުމަށްފަހު މިސްކިތް ވަނީ ހުޅުވާފައެވެ.

އިސްލާމިކް މިނިސްޓަރު ޑރ.ޝަހީމް މެމްބަރުންގެ ސުވާލުތަކަށް ޖަވާބުދެއްވަނީ.. ފޮޓޯ: މަޖިލިސް

މެމްބަރުގެ ސުވާލަށް ޖަވާބުދެއްވަމުން މިނިސްޓަރު ޝަހީމް ވިދާޅުވީ، ތުޅާދޫ މިސްކިތްހުރި ސަރަހައްދުން ގަބުރުތައް ނަގައި ސާފްކޮށް ނިމިގެންދިޔަ ރޯދަމަހު އެ މިސްކިތުގައި ނަމާދުކުރަން ފަށާފައިވާކަމަށެވެ. އެގޮތުން އެ މިސްކިތުގައި ނަމާދުކުރުމަށް ކުރިމަތިވި މައްސަލަތައް ހައްލުވެ ނިމިފައިވާކަން މިނިސްޓަރު ޝަހީމް ފާހަގަކުރެއްވިއެވެ.

ތުޅާދޫ މިސްކިތުން ގަބުރު ފެނުނު މައްސަލާގައި ކެންދޫ ދާއިރާގެ މެމްބަރު މައުރޫފް ޒާކިރު ސުވާލު ކުރެއްވިއިރު، ތުޅާދޫ ދާއިރާއަށް ނިސްބަތްވާ މެމްބަރަކު މަޖިލީހުގައި އިންނަވައެވެ. މަޖިލީހުގައި މި ދައުރު ތުޅާދޫ ދާއިރާ ތަމްސީލް ކުރައްވަނީ ތުޅާދޫއަށް އުފަން އަބްދުލްޙައްނާން އަބޫބަކުރެވެ.