ބ. މާޅޮހުގައި، ގެސްޓުހައުސް ހިންގާ ފަރާތްތައް އޮޅުވާލުމުގެ އެކި އުކުޅުތަކުން ރައްކާތެރިކުރުމުގެ ގޮތުން އެ ރަށުގެ ފުލުހުން މައުލޫމާތު ދިނުމުގެ ޚާއްޞަ ހަރަކާތެއް ހިންގައިފިއެވެ.
މި އޮގަސްޓް މަހުގެ ހަތަރު ވަނަ ދުވަހު ކުރިއަށް ގެންދިޔަ މި ހަރަކާތުގައި މާޅޮހު ފުލުހުން ވަނީ އެ ރަށުގެ ގެސްޓުހައުސްތަކަށް ގޮސް އެ ތަންތަނުގެ ވެރީންނާ ބައްދަލުކޮށްފައެވެ.
އެ ބައްދަލުވުންތަކުގައި އޮންލައިންކޮށް ހިންގާ ސްކޭމްތަކާ ބެހޭ ގޮތުންނާއި ބުކިން ކެންސަލްކުރުމަށް ފަހު ރިފަންޑް ހޯދުމުގެ ނަމުގައި ގެސްޓުހައުސް ވެރީންނަށް އަމާޒުކޮށް ހިންގާ އޮޅުވާލުންތަކާ ބެހޭ ގޮތުން ތަފްސީލީ މައުލޫމާތު ފޯރުކޮށްދީފައިވާ ކަމަށް ފުލުހުން ބުނެއެވެ.
މީގެ އިތުރުން އޮންލައިން ޕްލެޓްފޯމްތައް މެދުވެރިކޮށް ކުރެވޭ މުޢާމަލާތްތަކުގެ ޞައްޙަކަން ޔަގީންކުރާނެ ގޮތާއި ބޭރު ފައިސާގެ ލެންދެންތަކުގައި ފާރަވެރިވާންޖެހޭ ކަންކަމާ ގުޅޭ ގޮތުން ވެސް ލަފައާއި އިރުޝާދު ދީފައިވާ ކަމަށް ފުލުހުން ބުނެއެވެ. ހަމައެއާ އެކު މިފަދަ ސްކޭމެއްގެ ޝިކާރައަކަށް ވެއްޖެ ހާލަތެއްގައި ލަސްނުކޮށް ފުލުހުންނަށް ރިޕޯޓުކުރުމަށް ވެސް އެ ހަރަކާތުގައި އިލްތިމާސްކޮށްފައިވެއެވެ.
މި ޕްރޮގްރާމަކީ ގެސްޓުހައުސް ވިޔަފާރި ފުޅާ ދާއިރާއެއްގައި ހިންގާ މާޅޮހުގެ ވިޔަފާރިވެރީން ހޭލުންތެރިކުރުވުމުގެ ގޮތުން މާޅޮހު ފުލުހުން ހިންގި ހަރަކާތެކެވެ.
Advertisement
This content is created and paid for by advertisers and does not involve Voice Journalists
