މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ދަށުން ހިންގާ "އޭވިއޭޝަން އިންސްޓިޓިއުޓް އޮފް މޯލްޑިވްސް" (އެއިމް) ރަސްމީކޮށް އިފްތިތާޙުކޮށް އެ ތަނުން ފުރަތަމަ ފަހަރަށް ކޯސް ފުރިހަމަކުރި ދަރިވަރުންނަށް ސެޓްފިކެޓް ދީފިއެވެ.

ހުޅުލެ އައިލެންޑް ހޮޓަލުގެ ބޯލްރޫމުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވައި އިންސްޓިޓިއުޓް ހުޅުއްވައިދެއްވީ މޯލްޑިވްސް ނޭޝަނަލް ޔުނިވާސިޓީގެ ޗާންސެލަރ ޑރ. މަޙްމޫދު ޝައުޤީއެވެ. އެ ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދާއި ކުންފުނީގެ އެހެން އިސް ވެރީން ބައިވެރިވެވަޑައިގެންނެވިއެވެ.

ޖުމްލަ 29 ދަރިވަރަކު ވަނީ އެއަރޕޯޓް ސެކިއުރިޓީ މެނޭޖްމަންޓް ކޯހުން ސަނަދު ޙާޞިލްކޮށްފައެވެ. ދަސްވެނިންނަށް ސެޓްފިކެޓް ހަވާލުކޮށްދެއްވީ ސީއީއޯ އިބްރާހީމް ޝަރީފެވެ. ކޯހުން އެންމެ ރަނގަޅު ނަތީޖާ ހޯދި ދަރިވަރުންނަށް ޚާއްޞަ އެވޯޑް ހަވާލުކޮށްދެއްވީ ޗާންސެލަރ ޑރ. މަޙްމޫދު ޝައުޤީއެވެ.

ރަސްމިއްޔާތުގައި ވާހަކަފުޅު ދައްކަވަމުން ސީއީއޯ ޝަރީފް ވިދާޅުވީ އެއިމް ޤާއިމުކުރީ ރާއްޖޭގެ އޭވިއޭޝަން ދާއިރާއަށް ބޭނުންވާ ފަންނީ މީހުން ތައްޔާރުކުރުމުގެ މަޤްޞަދުގައި ކަމަށެވެ. އެ އިންސްޓިޓިއުޓަކީ އެއަރޕޯޓުތަކަށް ހުނަރުވެރި މުވައްޒަފުން ތަމްރީނުކުރުމަށް ކުންފުނިން ދިގު ރާސްތާއަށް ގެންގުޅޭ ތަޞައްވުރު ރަމްޒުކޮށްދޭ ތަނެއް ކަމަށް ވެސް ވިދާޅުވިއެވެ. ޗާންސެލަރ ޑރ. މަޙްމޫދު ޝައުޤީ ވަނީ ތަޢުލީމީ އަދި ހުނަރުވެރި ޖީލެއް ބިނާކުރުމަށް އެމްއޭސީއެލް އިން ކުރަމުންދާ މަސައްކަތަށް ތަޢުރީފް ކުރައްވައިފައެވެ.

މި ކޯހަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) ގެ މިންގަނޑުތަކާ އެއްގޮތް ސެޓްފިކެޓް ލެވެލް ތިނެއްގެ ޕްރޮގްރާމެކެވެ. 1 ޖޫން އިން 9 ސެޕްޓެމްބަރު 2025 އާ ހަމައަށް ކުރިއަށް ގެންދިޔަ މި ކޯހަކީ އެމްއޭސީއެލްގެ އެސްޓޭޓް ސެކިއުރިޓީ ޚިދުމަތާ އަލަށް ގުޅޭ މުވައްޒަފުންނަށް ޚާއްޞަ ތަމްރީނު ޕްރޮގްރާމެކެވެ. މި ޕްރޮގްރާމުގެ އެންމެ ބޮޑު އެއް އަމާޒަކީ ވެލާނާ އިންޓަރނޭޝަނަލް އެއަރޕޯޓުން ދަތުރުކުރާ ފަސިންޖަރުންގެ ރައްކާތެރިކަން އިތުރަށް ހަރުދަނާ ކުރުމެވެ.