އުރީދޫ ނޭޝަންގެ ޓައިޓަލް ސްޕޮންސާޝިޕާ އެކު ބާއްވާ ޕަބްޖީ މޮބައިލް ނޭޝަނަލް ޗެމްޕިއަންޝިޕް (ޕީއެމްއެންސީ) މޯލްޑިވްސް ފޯލް ނޭޝަނަލް ފައިނަލްސް މާލޭ ޔޫތު ހަބުގައި އޮގަސްޓް 14 އަދި 15 ގައި ބޭއްވުމަށް ނިންމައިފިއެވެ.

ޓެންސެންޓް ގޭމްސްއިން އިންތިޒާމުކުރާ މި މުބާރާތުގައި ރާއްޖޭގެ އެންމެ ކުޅަދާނަ 16 ޓީމު ބައިވެރިވާނެއެވެ. ފައިނަލް ބުރާ ހަމައަށް ދާން ޓީމުތައް ކޮލިފައިވީ އިން-ގޭމް ކޮލިފަޔާ މެޗުތަކުންނެވެ. އެ މެޗުތަކުގައި ގިނަ ޓީމުތަކެއް ވާދަކޮށް ގަދަ 32 ޓީމު ހޮވައި 16 ޓީމުގެ ދެ ގްރޫޕަކަށް ބެހުނެވެ. ކޮންމެ ގްރޫޕަކުންވެސް އެންމެ ރަނގަޅު ނަތީޖާ ހޯދި އަށް ޓީމަށް ފައިނަލް ބުރުން ވަނީ ޖާގަ ލިބިފައެވެ.

ދެ ދުވަހުގެ މައްޗަށް ބެހިގެންދާ ފައިނަލް ބުރުގައި ކޮންމެ ދުވަހަކު ފަސް މެޗު ޖުމްލަ 10 މެޗު ކުޅޭނެއެވެ. އެ މެޗުތައް ކުރިއަށްދާނީ ހަވީރު 4:00 އިން 6:00 އަށް އަދި ރޭގަނޑު 8:00 އިން 10:00 އަށެވެ. ހުރިހާ މެޗެއް ނިމުމުން ރާއްޖެ ތަމްސީލުކުރާ ގަދަ ތިން ޓީމު ކަނޑައެޅޭނެއެވެ. ސަޕޯޓަރުންނަށް ޔޫތު ހަބަށް ގޮސް މެޗުތައް ވަގުތުން ބެލުމުގެ ފުރުޞަތު ހުޅުވައިލައިފައިވާ އިރު އުރީދޫ ނޭޝަންގެ ޔޫޓިއުބް ޗެނަލުން އޮންލައިންކޮށް ވެސް ލައިވް ބެލޭނެއެވެ.

ފައިނަލުން ހޮވޭ ތިން ޓީމު ދެން ވާދަކުރާނީ ޕީއެމްއެންސީ ސައުތު އޭޝިއާ ރީޖަނަލް ލީގު ސްޓޭޖުގައެވެ. އެ ސްޓޭޖުގައި ސަރަޙައްދުގެ 24 ޓީމުގެ ތެރެއިން ގަދަ 16 ހޮވާނެއެވެ. އެއަށްފަހު އެ 16 ޓީމު ޕީއެމްއެންސީ ސައުތު އޭޝިއާ ގްރޭންޑް ފައިނަލްސްގައި ކުޅޭނެއެވެ. ގްރޭންޑް ފައިނަލުން އެންމެ މޮޅު ތިން ޓީމަށް ޕަބްޖީ މޮބައިލް ގްލޯބަލް އޯޕަން (ޕީއެމްޖީއޯ) އިން ޖާގަ ކަށަވަރުވާނެއެވެ.

ރާއްޖޭގައި ވާދަވެރި ގޭމިން ކުރިއަރަމުން އަންނަ އިރު އުރީދޫ ނޭޝަނުން މި ސްޕޮންސާޝިޕް މެދުވެރިކޮށް ދިވެހި އީ-ސްޕޯޓްސް ކުޅުންތެރިންނަށް ޤައުމީ ފެންވަރުން ފެށިގެން ދުނިޔޭގެ ފެންވަރާ ހަމައަށް ވާސިލުވެވޭނެ ރަސްމީ މަގެއް ފަހިކޮށްދެމުން ގެންދެއެވެ.