މިހާރު ކުރިއަށްދާ ކަޕްވިނާސްކަޕް މުބާރާތުގައި ރޭ ނިއުރޭޑިއަންޓް ސްޕޯޓްސް ކްލަބާއި މާޒިޔާ ބައްދަލުކުރިމެޗް އެއްވަރުވެގެން ނިމިއްޖެއެވެ.
ގަލޮޅު ދަނޑުގައި ކުޅުނު މިމެޗް ނިމުނީ 1-1 ގެ ނަތީޖާއިންނެވެ. ފޯރިގަދަ ކުޅުމެއް ފެނިގެންދިޔަ މި މެޗަކީ ކަޕްވިނާސްކަޕް ފައިނަލުގެ ކުރިން ކުޅޭނޭ އެންމެ ފަހު މެޗެވެ. ކަޕްވިނާސްކަޕް ފައިނަލަށްވެސް ދަތުރުކޮށްފައިވަނީ މި ދެޓީމެވެ. ރޭގެ މެޗް ފޯރިގަދަ ވެގެން ދިއުމުގެ މައިގަނޑު އެއް ސަބަބަކީވެސް އެއީއެވެ.
ނިއު އާއި މާޒިޔާ ބައްދަލުކުރިމެޗްގެ ތެރެއިން
ރޭގެ މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ މާޒިޔާއެވެ. އެއީ ދެވަނަ ހާފްގައި ނާސިހު އަހުމަދު ތަނަވަސްކޮށްދިން ފުރުސަތެއްގައި ޗަބެލް ގޮމޭޒް ކާމިޔާބުކޮށްދިން ލަނޑުންނެވެ. މާޒިޔާއިން ލީޑް ނަގާފައިވަނިކޮށް ނިއުރޭޑިއަންޓަށް އެއްވަރުކޮށްދިނީ އޭގެ ދިހަ މިނެޓް ފަހުން އަހުމަދު ހުސާމް އެވެ.
ނިއު އާއި މާޒިޔާ ބައްދަލުކުރިމެޗްގެ ތެރެއިން
މިމެޗްގައި ނިއުރޭޑިއަންޓްގެ އަލީ ފާސިރު، ސެންޓޭއަށް ލަނޑުޖަހާނެ ރަނގަޅު ފުރުސަތުތައް ފުރަތަމަ ހާފްގައި ލިބުނެވެ. ކަޕްވިނާސްކަޕް ފައިނަލުގައި ނިއުރޭޑިއަންޓާއި މާޒިޔާ ބައްދަލުކުރާ މެޗް ކުޅުމަށް ހަމަޖެހިފައިވަނީ އަންނަ ބުދަދުވަހުގެ ރެއެވެ.
Advertisement
This content is created and paid for by advertisers and does not involve Voice Journalists
