އައްޑޫގައި އިންޑިއާގެ ކޮންސިއުލޭޓެއް ގާއިމު ކުރަން ދެ ގައުމުން އެއްބަސްވެފައިވާ ކަމަށް އިންޑިއާ ސަފީރު ޖީ ބާލަސުބްރަމާނިއަން ވިދާޅުވެއްޖެ އެވެ.
ސަފީރު މިހެން ވިދާޅުވީ ރާއްޖެ-އިންޑިއާ ގުޅުމާއި ގުޅޭގޮތުން މޯލްޑިވްސް އިންޑިޕެންޑެންޓުން ކުރި ސުވާލުތަކަށް ދެއްވި ޖަވާބުގަ އެވެ. ރާއްޖެއާ އިންޑިއާގެ ގުޅުމާއި އިންޑިއާގެ އެހީގައި ރާއްޖޭގައި ހިންގާ މަޝްރޫއުތަކާއި އަދި އެ ނޫންވެސް މުހިންމު ކަމާއި ގުޅޭގޮތުން ސަފީރު ވަނީ މައުލޫމާތު ދެއްވާފަ އެވެ.
ދެ ގައުމުގެ ގުޅުން އިތުރަށް ހަރުދަނާކޮށް ބަދަހިކުރުމަށް ސުބްރަމާނިއަންގެ ސަފީރު ކަމުގައި ކުރައްވާ މަސައްކަތްތަކާއި ގުޅޭ ސުވާލުގެ ޖަވާބުގައި ސަފީރު ވަނީ އައްޑޫގައި އިންޑިއާގެ ކޮންސިއުލޭޓެއް ގާއިމު ކުރަން ދެ ގައުމުގެ ލީޑަރުން އެއްބަސްވެވަޑައިގެންފައިވާ ކަމަށް ވިދާޅުވެފަ އެވެ. އަދި ބެންގަލޫރުގައި ރާއްޖޭގެ ކޮންސިއުލޭޓެއް ގާއިމު ކުރުމުގެ މުހިންމުކަން ފާހަގަ ކުރެއްވި އެވެ.
ނަމަވެސް އިތުރަށް ތަފްސީލެއް ނުދެއްވަ އެވެ.
މޯލްޑިވްސް އިންޑިޕެންޑެންޓުގެ ލިޔުމުގައި ހިމަނާފައިވާ ސަފީރުގެ ފޮޓޯ
ސަފީރު ވިދާޅުވީ ސިޔާސީ ގޮތުންނާއި ތަރައްގީގެ ކަންކަމުގައި އެހީތެރިވެ އެއްބާރުލުން ދިނުމާއި ވިޔަފާރި އާއި އިގްތިސާދީ ކަންކަމުގައި އަދި ސިއްހަތާއި ދިފާއީ ދާއިރާ އާއި ސަލާމަތީ ދާއިރާއިން ގުޅުން ބަދަހިކުރުމަށް އިތުރު މަސައްކަތްތައް ކުރެވިފައިވާ ކަމަށެވެ.
ދިވެހީން ތަމްރީން ކުރުމަށް އިންޑިއާއިން ކުރަމުންދާ މަސައްކަތާއި އިންޑިއާގެ އެހީގައި ތަރައްގީކޮށްފައިވާ ހަނިމާދޫ އިންޓަނޭޝަނަލް އެއާޕޯޓާއި މިހާރު އަޅަމުންދާ ތިލަމާލެ ބްރިޖުގެ މަސައްކަތާއި ގުޅޭގޮތުން ވެސް ސަފީރު ވަނީ ވަރަށް ތަފްސީލުކޮށް ވާހަކަ ދައްކަވާފަ އެވެ. ސަފީރު ވިދާޅުވީ ދެ ގައުމުގެ އަމާޒަކީ ވެސް ތިލަމާލެ ބްރިޖުގެ މަސައްކަތް އަވަހަށް ނިންމުން ކަމަށެވެ. އެ މަޝްރޫއުގެ 76 ޕަސެންޓް މަސައްކަތް ނިމިފައިވާކަން ސަފީރު ފާހަގަ ކުރެއްވި އެވެ.
Advertisement
This content is created and paid for by advertisers and does not involve Voice Journalists
