އިންޑިއާގެ ބެންގަލޫރުގައި ރާއްޖޭގެ ކޮންސިއުލޭޓެއް އަދި ރާއްޖޭގެ އައްޑޫ ސިޓީގައި އިންޑިއާގެ ކޮންސިއުލޭޓެއް ޤާއިމުކުރުމާ ގުޅޭގޮތުން ބައެއް ނޫސްތަކުގައާއި މީސްމީޑިއާގައި ދެކެވެމުންދާ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް މިނިސްޓްރީ އޮފް ފޮރިން އެފެއާޒުން ބުނެފިއެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ، މާލެ ސިޓީ ފިޔަވައި ރާއްޖޭގެ އެހެން އެއްވެސް ރަށެއްގައި ބޭރު ޤައުމެއްގެ ކޮންސިއުލޭޓެއް ޤާއިމުކުރުމާމެދު ދިވެހި ސަރުކާރުން މިހާތަނަށް ވަކި ގޮތެއް ނިންމާފައި ނުވާ ކަމަށެވެ.
އަދި އެފަދަ ނިންމުމަކީ ކަމާބެހޭ ހުރިހާ ފަރާތްތަކެއް ހިމެނޭހެން، ފުޅާ ދާއިރާއެއްގައި މަޝްވަރާކޮށްގެން މެނުވީ ނިންމޭނެ ކަމެއް ނޫން ކަމަށްވެސް އެ މިނިސްޓްރީގެ ބަޔާނުގައި ވެއެވެ.
މީގެއިތުރުން، ބެންގަލޫރު އަދި އައްޑޫ ސިޓީގައި ކޮންސިއުލޭޓްތައް ހުޅުވަން ނިންމާފައިވާ ކަމަށް ބުނެ މީޑިއާތަކުގައި ޝާއިއުކޮށްފައިވާ ޚަބަރުތަކަކީ ސައްހަ ނޫން މައުލޫމާތުތަކެއްކަން ފާހަގަކުރަމުން ފޮރިން މިނިސްޓްރީން ވަނީ، ނޫސްތަކުގައާއި މީސްމީޑިއާގައި ތެދު އަދި ޒިންމާދާރު މައުލޫމާތު ޝާއިޢުކުރުމަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
