ކައުންސިލްތަކުގެ އިހުތިސާސުގައި ހިމެނޭ ބިމާއި ފަޅާއި ފަރު ވަޒީރުންގެ މަޖިލީހުގެ ނިންމުމަކުން ސަރުކާރުގެ ދަށަށް ގެނެވޭ ގޮތަށް ލާމަރުކަޒީ ޤާނޫނު ބަދަލުކުރުމުގެ ބިލަށް ތާއީދުކުރާ ޕެޓިޝަނަށް ސޮއި ހޯދުމަށް ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ބިރު ދައްކަމުންދާ ކަމަށް ރައީސް މުޙައްމަދު ނަޝީދު ވިދާޅުވެއްޖެއެވެ.
ތުޅާދޫ ދާއިރާގެ އަމިއްލަ މެންބަރު ޢަބްދުލްޙައްނާން އަބޫބަކުރު ހުށަހެޅުއްވި މި ބިލާ ދެކޮޅަށް ފުރަތަމަ ހުށަހެޅި ޕެޓިޝަނަށް 4000 އަށްވުރެ ގިނަ ސޮއި ލިބިފައި ވަނިކޮށް، ބިލަށް ތާއީދުކޮށް ބިލުގެ މަސައްކަތް ކުރިއަށް ގެންދަން އެހެން ފަރާތަކުން ވަނީ ޕެޓިޝަނެއް ހުށަހަޅާފައެވެ. އެ ހުށަހެޅި ޕެޓިޝަނަށް މިހާތަނަށް 7811 ސޮއި ލިބިފައިވެއެވެ.
އެކަމާގުޅިގެން ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ ބިލާ ދެކޮޅަށް ރައްޔިތުން ޕެޓިޝަނެއް މަޖިލީހަށް ހުށަހެޅުމާ ގުޅިގެން ބިލަށް ތާއީދުކުރާ ކަމަށް ދައްކަން ވަކި ޕެޓިޝަނެއް ހެއްދެވުމުގެ މަސައްކަތް ސަރުކާރުން ކުރަމުންދާ ކަމަށެވެ.
އަދި އެ މަސައްކަތުގައި ރަށްރަށުގެ އެސްއޯއީ އޮފީސްތަކުގެ މުވައްޒަފުންނަށް މަޖުބޫރުކުރަމުންދާ ކަމަށް ވެސް އެ މަނިކުފާނު ވިދާޅުވެފައިވެއެވެ.
"ކަމެއްގެ ތާއީދު އޮތްކަން ދައްކަން ރައްޔިތުންނަށް ބިރު ދައްކައިގެން ސޮއި ހެއްދެވުމުގެ ބޮޑު ގެއްލުން އޮތީ ހަމަ ސަރުކާރަށް. އެ ގެއްލުމަކީ ރައްޔިތުންގެ ތާއީދު ހުރި ނެތް މިންވަރު ޚުދު ސަރުކާރަށް ވެސް އޮޅުން" ނަޝީދު ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
