މިވަގުތު އެންމެ ބޮޑު އިސްކަމެއްދެނީ ހުޅުމާލޭގެ ދެވަނަ ފިޔަވަހީގައި ތަރައްޤީކޮށްފައިވާ އަމާން ޓަވަރުތަކުގެ ވަށައިގެންވާ ސަރަޙައްދުތަކަކީ ރައްޔިތުންނަށް ދިރިއުޅެން ފަސޭހަ އަދި ހިތްގައިމު މާޙައުލަކަށް ހެދުމަށް ކަމަށް ފަހި ދިރިއުޅުން ކޯޕަރޭޝަން (އެފްޑީސީ) ގެ މެނޭޖިންގ ޑިރެކްޓަރ ޙަމްދާން ޝަކީލް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ހުޅުމާލޭ ދެވަނަ ފިޔަވަހީގައި އެފްޑީސީން އިމާރާތްކޮށްފައިވާ އަމާން ޓަވަރުތަކުގައި ދިރިއުޅޭ ރައްޔިތުންނަށް ޚާއްޞަކޮށްގެން އެ ކުންފުނިން ބޭއްވި ކޮމިއުނިޓީ އިވެންޓެއްގައި ވާހަކަދައްކަވަމުންނެވެ. މި ބައްދަލުވުމުގައި ޙަމްދާން ވަނީ އެ ސަރަޙައްދު ތަރައްޤީކުރުމަށް ކުންފުނިން މިހާރު ކުރަމުންގެންދާ މުހިންމު މަސައްކަތްތަކުގެ ތަފްޞީލު ހިއްސާކުރައްވާފައެވެ.
ހަމްދާން ފާހަގަކުރެއްވި ގޮތުގައި، އަމާން ޓަވަރުތައް ހިމެނޭ ސަރަޙައްދުތަކުގެ ތެރެއިން އެންމެ ބާރުބޮޑު އެއް ސަރަޙައްދު ކަމަށްވާ "އަމާން އުދަރެސް" 14 ވަނަ ޓަވަރުގެ ޕާކިންގ ޒޯން ތަރައްޤީކުރުމުގެ މަސައްކަތް މިހާރު ވަނީ އެއްކޮށް ނިންމާލެވިފައެވެ. އަދި ބާކީ ހުރި ސަރަޙައްދުތައް ވެސް ދެމެހެއްޓެނިވި އުސޫލެއްގެ ދަށުން އެކި ފިޔަވަހިތަކަށް ބަހާލައިގެން ކުރިއަށްގެންދިއުމަށް ރޭވިފައިވާ ކަމަށް ވިދާޅުވިއެވެ. އެގޮތުން، ލޭންޑްސްކޭޕިންގެ ފުރަތަމަ ފިޔަވަހީގެ ދަށުން 32 ޓަވަރެއްގެ ރެސިޑެންޝަލް އެންޓްރެންސްތައް ތަރައްޤީކުރުމުގެ މަސައްކަތް މިހާރުވެސް ހަލުވިކަމާއެކު ކުރިއަށްދާކަން އެމަނިކުފާނު ފާހަގަކުރެއްވިއެވެ.
އެފްޑީސީން ބޭއްވި އިވެންޓްގެ ތެރެއިން..
މީގެއިތުރުން، މި ހުރިހާ މަސައްކަތްތަކަކީ ވެސް ބޭރުގެ އެއްވެސް ކޮންޓްރެކްޓަރަކާ ނުލައި، އެފްޑީސީގެ އަމިއްލަ މުވައްޒަފުން ކުރިއަށްގެންދާ މަސައްކަތްތަކެއްކަން ޙަމްދާން ވަނީ ފަޚުރުވެރިކަމާއެކު ވިދާޅުވެފައެވެ.
ހަމައެއާއެކު، ހައުސިންގ މަޝްރޫޢުގެ އަސްލު ސްކޯޕްގައި ހިމެނިފައި ނެތް ނަމަވެސް، ރައްޔިތުންގެ ސަލާމަތާއި އަމާންކަން ކަށަވަރުކުރުމަކީ ސަރުކާރުގެ މުހިންމު އަމާޒަކަށް ވާތީ، އެފްޑީސީން އިސްނަގައިގެން ވަނީ ޓަވަރުތަކުގައި ސީސީޓީވީ ކެމެރާ ހަރުކުރުމުގެ މަސައްކަތް ވެސް ފަށާފައެވެ. އެގޮތުން "އަމާން އުދަރެސް" ޓަވަރުތަކުގެ ސީސީޓީވީ ނިޒާމު މިހާރު ފުރިހަމައަށް ބޭނުންކުރަން ފަށާފައިވާއިރު، "އަމާން ހިޔާ" ޓަވަރުތަކުގެ މަސައްކަތް ވެސް ނިމުމަކާ ގާތްވެ، ބައެއް ޓަވަރުތަކުގެ ސިސްޓަމްތައް މިހާރު ވަނީ އޮޕަރޭޝަނަށް ގެނެވިފައި ކަމަށް އެމްޑީ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
