ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ފަލާޙް ޕްރީސްކޫލްގެ ރަންޔޫބީލް ފާހަގަކުރުމުގެ ޖަލްސާ ޝަރަފުވެރިކޮށްދެއްވައިފިއެވެ.
އެ ޖަލްސާގައި ރައީސުލްޖުމްހޫރިއްޔާ ވަނީ ފަލާޙް ޕްރީސްކޫލްގެ ވެބްސައިޓް ރަސްމީކޮށް އިފްތިތާޙުކޮށްދެއްވާފައެވެ. އޭގެ އިތުރުން 10 އަހަރަށްވުރެ ދިގު މުއްދަތެއްގައި އެ ސްކޫލަށް ޚިދުމަތްކޮށްދެއްވި ފަރާތްތަކަށް ހަނދާނީ ފިލާ ޙަވާލުކޮށްދެއްވީ ވެސް ރައީސުލްޖުމްހޫރިއްޔާއެވެ. ރަންޔޫބީލް ލޯގޯ ފަރުމާކޮށްދެއްވި ފަރާތަށް ހަނދާނީ ލިޔުން ދިނުން ވެސް މިއަދުގެ ރަސްމިއްޔާތުގައި ކުރިއަށް ދިޔައެވެ.
ފަލާހް ޕްރީ ސްކޫލްގެ ރަންޔޫބީލް ޖަލްސާ.. ފޮޓޯ: ރައީސް އޮފީސް
ޖަލްސާގައި ރައީސުލްޖުމްހޫރިއްޔާއަށް ރަންޔޫބީލް ހަނދާނީ ފިލައެއް ވެސް މި ޖަލްސާގައި ވަނީ އަރުވާފައެވެ. އެ ފިލާ އެމަނިކުފާނަށް އެރުވީ ފަލާޙް ޕްރީސްކޫލްގެ ޗީފް އެގްޒެކެޓިވް އަލްޤާރީ އަލްހާފިޡް ޢަބްދުއްސައްތާރު އަބޫބަކުރެވެ.
ދަޢުލަތުގެ ވަޒީރުންނާއި މުއައްސަސާތަކުގެ އިސް ބޭފުޅުންގެ އިތުރުން ފަލާޙް ޕްރީސްކޫލްގެ ކުރީގެ އަދި މިހާރުގެ މުވައްޒަފުންނާއި ދަރިވަރުން އަދި ތަޢުލީމީ ދާއިރާގެ ޚިދުމަތްތެރީން މި ޖަލްސާގައި ބައިވެރިވެވަޑައިގެންނެވިއެވެ.
ފަލާހް ޕްރީ ސްކޫލްގެ ރަންޔޫބީލް ޖަލްސާ.. ފޮޓޯ: ރައީސް އޮފީސް
ޖަމިއްޔަތުލް ފަލާޙުން 1976 ވަނަ އަހަރު ދީނީ ހޭލުންތެރިކަން ފެތުރުމުގެ މަޤްޞަދުގައި 'މަދްރަސަތުލް ފަލާޙް' ގެ ނަމުގައި ހުޅުވި މި މުއައްސަސާ 2001 ވަނަ އަހަރު ތުއްތު ކުދިންނަށް ކިޔަވައިދޭ ގްރޭޑްތައް ތަޢާރަފްކުރުމާ އެކު 'ފަލާޙް ޕްރީސްކޫލް' ގެ ނަމަށް ބަދަލުކޮށްފައިވެއެވެ.
Advertisement
This content is created and paid for by advertisers and does not involve Voice Journalists
