ރާއްޖޭގައި ވަޒީފާ އަދާކުރާ ބިދޭސީ މަސައްކަތްތެރިންނަށް މުސާރަ ދެނީ އެ މީހުންގެ އަމިއްލަ ބޭންކް އެކައުންޓަށް ކަން ކަށަވަރުކުރުމަށް ވަޒީފާދޭ ހުރިހާ ފަރާތްތަކަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާއިން އިލްތިމާސްކޮށްފިއެވެ.
މިދިޔަ މަހުގެ 25 ވަނަ ދުވަހު ގެނެސްފައިވާ ގަވާއިދުގެ އިސްލާހުގައި ބުނާ ގޮތުން ބިދޭސީ މުވައްޒަފަކަށް ވަޒީފާގެ އެއްބަސްވުމުގެ ދަށުން ލިބެންޖެހޭ މުސާރަ ޖަމާކުރަންވާނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ރަޖިސްޓަރީކޮށް ނުވަތަ ހުއްދަ ދީފައިވާ ބޭންކެއްގައި އެ މީހެއްގެ ނަމުގައި ހުޅުވާފައިވާ އެކައުންޓަކަށެވެ. އެހެންވެ ބިދޭސީ މުވައްޒަފުންގެ އެކައުންޓްތައް ވީ އެންމެ އަވަހަކަށް ހުޅުވައި ނިންމުމަށް އެ ވުޒާރާއިން ވަނީ ވަޒީފާދޭ ފަރާތްތަކަށް އިލްތިމާސްކޮށްފައެވެ.
މި އިސްލާހާ ގުޅިގެން ލޭބަރ ރިލޭޝަންސް އޮތޯރިޓީން ތަހުގީގުކުރާ މުސާރައިގެ މައްސަލަތަކުގައި ވެސް މުވައްޒަފަށް މުސާރަ ދީފައިވާ ކަމަށް ބެލެވޭނީ އެމްއެމްއޭ ގައި ރަޖިސްޓަރީކޮށް ނުވަތަ ހުއްދަ ދީފައިވާ ބޭންކެއްގައި ހުންނަ އެ މީހެއްގެ އެކައުންޓަށް ފައިސާ ޖަމާކޮށްފައި ހުރެގެން ކަމަށް އެ ވުޒާރާއިން ފާހަގަކޮށްފައިވެއެވެ.
ބިދޭސީންގެ މުސާރަ ބޭންކް އެކައުންޓަށް ޖަމާކުރުން ލާޒިމުކޮށް ކުރިން ވެސް ވަޒީފާއާ ބެހޭ ޤާނޫނު އިސްލާހުކޮށް އެ ގޮތަށް ޢަމަލުނުކުރާ ފަރާތްތައް ޖޫރިމަނާ ކުރެވޭ ގޮތް ހެދިއެވެ. އެހެން ނަމަވެސް ޞައްޙަ ލިޔެކިޔުން ނެތް ގިނަ ބިދޭސީންނަށް އެކައުންޓް ނުހެދޭތީ ޖޫރިމަނާ ނެގުން ވަކި ހިސާބަކުން މެދުކަނޑައިލިއެވެ. ކުރީގެ އިސްލާހު ގެނައި މައިގަނޑު ބޭނުމަކީ ބިދޭސީން ރާއްޖެއިން ބޭރަށް ފޮނުވާ ފައިސާއިން ދައުލަތަށް ނަގާ ޓެކުހެއް ކަމުގައިވާ ރެމިޓެންސް ޓެކްސް ނެގުމެވެ.
ބިދޭސީ މަސައްކަތްތެރިން ގަވާއިދުގެ ތެރެއަށް ވެއްދުމާއި އެ ފަރާތްތަކުގެ ޙައްޤުތައް ހިމާޔަތްކުރުމަށް ސަރުކާރުން ތަފާތު ފިޔަވަޅުތައް އަޅަމުން އަންނައިރު ބައެއް ބިދޭސީންނަށް ޑޮލަރުން މުސާރަ ލިބޭތީ ކަޅު ބާޒާރުގައި ޑޮލަރު ވިއްކުމާއި ރުފިޔާއިން މުސާރަ ލިބޭ ފަރާތްތައް ބޮޑު އަގުގައި ޑޮލަރު ގަތުމުގެ މައްސަލަ ވެސް ފާހަގަކުރެވެމުން ދެއެވެ.
Advertisement
This content is created and paid for by advertisers and does not involve Voice Journalists
