އެމެރިކާގެ ސްޕޭސް ފޯސްއިން އޯބިޓަށް ހަތިޔާރު ފޮނުވައި އެކަން އެ ޤައުމުން ފުރަތަމަ ފަހަރަށް މިއަދު ރަސްމީކޮށް ކަށަވަރުކޮށްދީފިއެވެ.
މިކަން ހާމަކުރީ އެއާ އެންޑް ސްޕޭސް ސައިބާ ކޮންފަރެންސްގައި ވާހަކަ ދައްކަމުން އެމެރިކާގެ ވައިގެ ސިފައިންގެ ސެކްރެޓަރީ ޓްރޯއީ މެއިންކެވެ. ޖައްވަށް ފޮނުވީ ކޮން ބާވަތެއްގެ ހަތިޔާރެއް ކަމެއް ނުވަތަ ކޮން އިރަކު ކަމެއް އޭނާ ތަފުސީލުކޮށްދީފައެއް ނުވެއެވެ. ނަމަވެސް އެމެރިކާގެ ދުޝްމިނުންގެ ފަރާތުން ކުރިމަތިވާ ނުރައްކާތައް ހަލުވިކަމާ އެކު އިތުރުވަމުންދާ ކަމަށާއި ދުޝްމިނުން އައު ޓެކްނޮލޮޖީތައް ބޭނުންކޮށް ފައިދާ ނަގަމުންދާ ކަމަށް މެއިންކް ބުންޏެވެ. އެ ސަބަބާ ހެދި އޮޓޮނޮމަސް ސިސްޓަމްތަކާއި ޚަރަދު ކުޑަ ހަތިޔާރު ބޭނުންކޮށްގެން ހަނގުރާމައިގެ ބާރުވެރިކަން އެމެރިކާއިން އަވަހަށް ވަރުގަދަކުރަން ޖެހޭ ކަމަށް އޭނާ ބުންޏެވެ.
"މިނިވަންކަމާ އެކު ޢަމަލުކުރެވޭ ގިނަ ޢަދަދެއްގެ ސިސްޓަމް ބޭނުންކޮށްގެން އަޅުގަނޑުމެންގެ ހަނގުރާމައިގެ ބާރުވެރިކަން ވަރަށް ބޮޑު ތަނުން އިތުރުކުރާނެ" ކަމަށް މެއިންކް ވިދާޅުވިއެވެ.
އޭނާ ވިދާޅުވީ މިއަދު އެޅޭ ފިޔަވަޅުތަކުގެ ސަބަބުން 2032 ވަނަ އަހަރާ ހަމައަށް މުޅިން ތަފާތު ސިފައެއްގެ ވައިގެ ސިފައިންގެ ފައުޖެއް ފެނިގެންދާނެ ކަމަށް ވެސް އޭނާ ބުންޏެވެ.
މެއިންކް މި ވާހަކަ ހާމަކުރި ދަނޑިވަޅަކީ ހައިބްރިޑް ހަމަލާތަކުގެ ބިރު ބޮޑުވެ ދިފާޢީ ނިޒާމުތައް މުރާޖަޢާ ކުރުމާ މެދު ދުނިޔޭގެ ސަރުކާރުތަކުން ވިސްނަމުންދާ ދަނޑިވަޅެކެވެ. ޔޫކްރެއިންގެ ހަނގުރާމައިން ފެނިގެން ގޮސްފައިވާ ގޮތުގައި ޒަމާނީ ހަނގުރާމަ ދަނީ އޮޓޮނޮމަސް ސިސްޓަމްތަކާއި އޭއައި (މެޝިނަށް ވިސްނުމުގެ ޤާބިލުކަން ދިނުން) އަދި ޑްރޯންތަކާ ދިމާއަށެވެ.
މީގެ އިތުރުން ވިޔަފާރީގެ ޖައްވީ އިޤުތިޞާދަށް އިންވެސްޓަރުންގެ ޝައުޤު ވެސް ދަނީ ބޮޑުވަމުންނެވެ. މި އަހަރު ސްޕޭސްއެކްސް ޢާންމު ހިއްސާ ބާޒާރުގައި ލިސްޓުކޮށް މިހާތަނަށް ބޭއްވުނު އެންމެ ބޮޑު އައިޕީއޯ ހެދުމާ އެކު މި ދާއިރާއަށް އިތުރު ފައިސާ ދައުރުވާނެ ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
