ސިނަމާލެ ބްރިޖުގައި ނުރައްކާތެރިކޮށް ސައިކަލު ދުއްވި މީހާ ދެނެގަނެ އެ މީހާއަށް ފިޔަވަޅު އަޅައިފި ކަމަށް ފުލުހުން ބުނެފި އެވެ.
ބްރިޖުގައި ނުރައްކާތެރިކޮށް ސައިކަލު ދުއްވާ މަންޒަރު ފެންނަ ވީޑިއޯއެއް އާންމުވެ ގިނަ ބަޔަކު އެކަން ބަލާ ހަރުކަށި ފިޔަވަޅު އެޅުމަށް ގޮވާލާފަ އެވެ. އަދި މިއީ ނުރައްކާތެރި ހާދިސާއެއް ހިނގާ އެކަމުން އެހެން މީހުންނަށް ވެސް ނުރައްކާވާނެ ކަމަކަށް ވުމުން އެފަދަ ކަންކަން ކުރާ މީހުންނަށް ހަރުކަށި ފިޔަވަޅު އަޅަން ޖެހޭ ކަމަށް ގިނަ ބަޔަކު ދިޔައީ ބުނަމުންނެވެ.
އެކަމާއި ގުޅޭގޮތުން ސުވާލުކުރުމުން ފުލުހުން މިރޭ ބުނީ ނުރައްކާތެރިކޮށް ނުވަތަ ފަރުވާކުޑަކޮށް އެއްގަމު އުޅަނދު ދުއްވާ މަންޒަރު ފެންނަ ވީޑިއޯއެއް ސޯޝަލް މީޑިއާ މެދުވެރިކޮށް ދިވެހި ފުލުހުންގެ ޚިދުމަތުގެ ސަމާލުކަމަށް އައުމާ ގުޅިގެން، އެ އުޅަނދާއި އުޅަނދު ދުއްވި ފަރާތް ދެނެގަނެ، އެ އުޅަނދު 30 ދުވަހުގެ މުއްދަތަށް ޓޯވ ކޮށްފައިވާ ކަމަށެވެ. އަދި އެ އުޅަނދު ދުއްވި މީހާގެ ލައިސަންސް ހިފަހައްޓައި އޭނާ ވަނީ ޖޫރިމަނާ ކޮށްފައި ކަމަށެވެ.
ބްރިޖުގައި ނުރައްކާތެރިކޮށް ދުއްވުން ވަނީ އާންމު ކަމަކަށް ވެފަ އެވެ. ބައެއް ޒުވާނުން އެކަން ކުރަނީ ސޯޝަލް މީޑިއާގައި މޮޅެތި ވީޑިއޯ ހިއްސާކުރުމަށެވެ.
Advertisement
This content is created and paid for by advertisers and does not involve Voice Journalists
