ލަގެޖް ހިފައިގެން ބްރިޖުން ހިނގާފައި އެއާޕޯޓަށްދާން އުޅުނު ބަޔަކު ހުއްޓުވާ ނަސޭހަތް ދީފި އެވެ.

ސިނަމާލެ ބްރިޖުގައި ހިނގުމަށް ދެ ލޭން ހާއްސަ ކޮށްފައިވެ އެވެ. ނަމަވެސް ބްރިޖު ނިމޭ ހިސާބަށް ވުރެ ކުރިއަށް ދިއުމަކީ މަނާ ކަމެކެވެ.

ދެ މީހަކު، ބްރިޖުގައި ލަޖެގް ހިފައިގެން އެއާޕޯޓަށް ހިނގާފައި ދަނިކޮށް ފެންނަ ވީޑިއޯއެއް މިއަދު ވައިރަލްވި އެވެ.

އެ ކަމާއި ގުޅޭގޮތުން ސުވާލުކުރުމުން ފުލުހުން މިރޭ ބުނީ މިއަދު ހަވީރު 5:00 އެހައިކަންހާއިރު ސިނަމާލެ ބްރިޖް މަތިން އެއާޕޯޓާ ދިމާއަށް ހިނގާފައި ދިޔަ ދެ ބިދޭސީއަކަށް ފުލުހުން ވަނީ އެޓެންޑްވެފައި ކަމަށެވެ.

އަދި އެ ސަރަހައްދަކީ ހިނގާފައި ދިއުން މަނާ ސަރަހައްދެއްކަން އެ މީހުންނަށް އަންގައި ނަސޭހަތްތެރިވުމަށްފަހު، އެ މީހުންގެ ދަތުރު ކުރިއަށް ގެންދިއުމަށްޓަކައި ޓެކްސީއެއް ހޯދައިދީ ފުލުހުން ވަނީ އެހީތެރިކަން ފޯރުކޮށްދީފައި ކަމަށެވެ.