މަގުމަތި ބޭނުންކުރުމުގައި އިތުރަށް ފަރުވާތެރިވެ، މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން ރައްޔިތުން ހޭލުންތެރިކުރުވުމަށް މޯލްޑިވްސް ޕޮލިސް ސާވިސްއިން ހާއްސަ ހަރަކާތްތަކެއް ފަށައިފިއެވެ.
މަގުމަތި ބޭނުންކުރުމާއި އެނޫންވެސް ސަލާމަތީ ކަންކަމާ ގުޅޭގޮތުން އާންމުން ހޭލުންތެރިކުރުވުމަށް ފެށި މި ސިލްސިލާ ހަރަކާތުގެ ތެރެއިން މިއަދު ވަނީ ސްކޫލްތައް ކައިރީގައި މައުލޫމާތު ދިނުމުގެ ހާއްސަ ޕްރޮގްރާމްތަކެއް ކުރިއަށް ގެންގޮސްފައެވެ. މި ޕްރޮގްރާމްގެ ދަށުން ސްކޫލްތަކުގެ ދަރިވަރުންނަށާއި، ބެލެނިވެރިންގެ އިތުރުން ސްކޫލް ސަރަހައްދު ބޭނުންކުރާ ދުއްވާ އެއްޗެއްސާއި ހިނގާފައި އުޅޭ ފަރާތްތަކަށް މަގުމަތީގެ ރައްކާތެރިކަމާ ގުޅޭ މުހިންމު މައުލޫމާތުތައް ވަނީ ފޯރުކޮށްދީފައެވެ.
ފުލުހުން ކުރިއަށްގެންދާ ހަރަކާތުގެ ތެރެއިން.. ފޮޓޯ: ވޮއިސް
ފުލުހުން މިފަދަ ހޭލުންތެރިކުރުމުގެ ހަރަކާތްތަކެއް ވަރުގަދަކޮށްފައި މިވަނީ، މި ފަހަކަށް އައިސް ހާއްސަކޮށް ހުޅުމާލޭގެ މަގުތަކުގައި ނުރައްކާތެރި އެކްސިޑެންޓްތައް ހިނގާ މިންވަރު އާދަޔާ ހިލާފަށް އިތުރުވެފައިވާ ދަނޑިވަޅެއްގައެވެ. މިގޮތުން ހިނގި ބައެއް ނުރައްކާތެރި އެކްސިޑެންޓްތަކުގައި ބޮޑެތި މީހުންނާއި ކުޑަކުދިންގެ އަގުހުރި ފުރާނަ ގެއްލި، އެތައް ބަޔަކަށް ބޮޑެތި އަނިޔާތަކެއް ވަނީ ލިބިފައެވެ.
ފުލުހުން ކުރިއަށްގެންދާ ހަރަކާތުގެ ތެރެއިން.. ފޮޓޯ: ވޮއިސް
ފުލުހުން މައުލޫމާތު ދޭ ގޮތުގައި މި ހަރަކާތްތަކުގެ މައިގަނޑު މަގުސަދަކީ މަގުމަތީގެ ގަވާއިދުތަކަށް ހުރުމަތްތެރިކޮށް ހިތުމުގެ މުހިންމުކަން ހަނދާންކޮށްދީ، އެންމެންގެ ފުރާނައިގެ ރައްކާތެރިކަމަށްޓަކައި ހުރިހާ ރައްޔިތުންވެސް މަގުމަތީގައި އިތުރަށް ޒިންމާދާރުވެ ފަރުވާތެރިވުމަށް ބާރުއެޅުމެވެ. އަދި ކުރިއަށް އޮތް ތަނުގައިވެސް މަގުމަތީގެ އަމާންކަން ގާއިމުކުރުމަށްޓަކައި މިފަދަ ގިނަ ހަރަކާތްތަކެއް ހިންގުމަށް ވަނީ ރޭވިފައެވެ.
މިއަދު ހުޅުމާލޭގައި ކުރިއަށްދާ ހަރަކާތުގައި ފުލުހުންގެ އިތުރަށް ހުޅުމާލެއާ ގުޅުންހުރި ޖަމިއްޔާތަކުގެ އިސް ފަރާތްތަކުން ބައިވެރިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
