ކުރިއަށް އޮތް މިޑްޓާމް އިންތިޚާބުގައި ރިޕަބްލިކަން ޕާޓީން ކޮންގްރެސްގެ އަޣުލަބިއްޔަތު ދަމަހައްޓައިފިނަމަ، އެމެރިކާގެ ކޮންމެ ބޮޑު މީހަކަށް 5،000 ޑޮލަރު ދޭނެ ކަމަށް ރައީސް ޑޮނަލްޑް ޓްރަމްޕް ބުނެފިއެވެ. ޓްރަމްޕް މިކަން އިޢުލާންކުރީ ބުދަ ދުވަހު ޑެލަސްގައި ބޭއްވި ރިޕަބްލިކަން ޕާޓީގެ ފުރަތަމަ މިޑްޓާމް ކޮންވެންޝަންގައެވެ.

"ޓްރަމްޕް ޑިވިޑެންޑް" ގެ ނަމުގައި މި ފައިސާ ދޭން ހުށަހެޅި ނަމަވެސް، މިކަން ކުރާނެ ގޮތެއް އަދި މިއީ ޤާނޫނީ ގޮތުން ކުރެވިދާނެ ކަމެއް ކަމެއް ސާފެއް ނޫނެވެ. އެމެރިކާގައި 18 އަހަރުން މަތީގެ ގާތްގަނޑަކަށް 270 މިލިއަން މީހުން ދިރިއުޅޭއިރު، މިއީ ގާތްގަނޑަކަށް 1.35 ޓްރިލިއަން ޑޮލަރުގެ ޚަރަދެކެވެ.

ގަޑިއިރަކާއި 45 މިނެޓަށް ދެމިގެންދިޔަ ތަޤުރީރުގައި ޓްރަމްޕް ބުނީ، އޭނާ ފުރިހަމަކޮށްފައިވަނީ އެމެރިކާގެ ރިޔާސީ ތާރީޚުގައިވެސް ފެނިގެންދިޔަ އެންމެ ކާމިޔާބު ދެ އަހަރު ކަމަށެވެ. އަދި ޑިމޮކްރެޓުންނަށް ވެރިކަން ލިބިއްޖެނަމަ ޤައުމު އަލުން ކޮޅަށް ޖެހުމަށް ދިހަ އަހަރު ނަގާނެ ކަމަށާއި، ރިޕަބްލިކަން ޕާޓީއަށް ވޯޓު ދިނުމަށް ޓްރަމްޕް ވަނީ ގޮވާލާފައެވެ.

ނޮވެމްބަރު މަހު ބާއްވާ މިޑްޓާމް އިންތިޚާބަށް ދެ މަހެއްހާ ދުވަސް ބާކީ އޮތްއިރު، ޓްރަމްޕްގެ މަޤްބޫލުކަން ދަށަށް ގޮސް، ޚާއްޞަކޮށް ދިރިއުޅުމުގެ ޚަރަދުތައް ބޮޑުވުމާއި އީރާނާ ދެކޮޅަށް ކުރާ ހަނގުރާމައިގެ ސަބަބުން ޢާންމުންގެ މެދުގައި ވަނީ ނުތަނަވަސްކަން އުފެދިފައެވެ.

އީރާނަށް ޙަމަލާދިނުމުގެ ނިންމުން ދިފާޢުކުރަމުން ޓްރަމްޕް ބުނީ، އޭނާ އެކަން ކުރީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުމަށް ކަމަށެވެ. އަދި އީރާނުގެ މައްޗަށް ކާމިޔާބު ހޯދުނުހާ އަވަހަކަށް ތެލުގެ އަގު ދަށަށްދާނެ ކަމަށްވެސް ޓްރަމްޕް ބުނެފައިވެއެވެ. ނަމަވެސް، އެމެރިކާއާއި އިސްރާއީލުން އީރާނަށް ޙަމަލާދޭތާ ހަ މަހަށްވުރެ ގިނަ ދުވަސް ވެފައިވާއިރުވެސް، މި ހަނގުރާމަ ނިމުމަކަށް އަންނާނެ ކަމުގެ އެއްވެސް ނިޝާނެއް ނުފެންނަ ކަމަށް މުރާސިލުން ފާހަގަކުރެއެވެ.

މި ކޮންވެންޝަންގައި ވާހަކަދެއްކި ރިޕަބްލިކަން ޕާޓީގެ ގިނަ މީހުން ވަނީ ޑިމޮކްރެޓުންނަކީ ހައްދުފަހަނައެޅި "ސޯޝަލިސްޓުން" އަދި "ކޮމިއުނިސްޓުން" ގެ ގޮތުގައި ސިފަކޮށް ވަރަށް ބޮޑަށް ފާޑުކިޔާފައެވެ.

މި އެއްވުމުގައި 21،000 މީހުންގެ ޖާގައިގެ އެރީނާ ފުރިފައިވާ ކަމަށް ޓްރަމްޕް ބުނި ނަމަވެސް، އޭނާ ވާހަކަދެއްކި ވަގުތު މަތީ ބައިތައް އޮތީ ބޮޑުބައެއް ހުސްކޮށެވެ. އިންތިޚާބު ކާމިޔާބުކުރުމަށްޓަކައި ޓްރަމްޕް މިފަދަ ބޮޑު ވަޢުދެއް ވެފައިވާއިރު، މިއީ އިންތިޚާބީ ވާދަވެރިކަން ވަރަށް ބޮޑަށް ގަދަވެފައިވާ ދަނޑިވަޅެކެވެ.